തിരുവനന്തപുരം: പൂവാറിൽ നിന്ന് മണലിവിള വഴി തമ്പാനൂരിലേക്കുള്ള കെ.എസ്.ആർ.ടി.സി സർവീസ് മുടങ്ങിയതോടെ പ്രദേശവാസികൾ ദുരിതത്തിൽ.ഇതുവഴി ആകെയുള്ള രണ്ട് ബസുകൾ അവധി ദിവസങ്ങളിൽ സർവീസ് നടത്താതായതാണ് യാത്രക്കാരെ വലയ്ക്കുന്നത്.രാവിലെ 6.10നും 6.30നുമാണ് മണലിവിള - തിരുവനന്തപുരം സർവീസുകളുള്ളത്.ഇവ സർക്കുലറായാണ് പോവുക.രാത്രി 8.15നാണ് തമ്പാനൂരിൽ നിന്ന് മണലിവിള വഴി അവസാന സർവീസ്. ദീർഘനാളായി ബസുകൾ അവധി ദിവസങ്ങളിൽ സർവീസ് നടത്തുന്നില്ലെന്നാണ് നാട്ടുകാരുടെ പരാതി.പലതവണ പരാതിപ്പെട്ടെങ്കിലും നടപടിയൊന്നും എടുത്തിട്ടില്ല.അതേസമയം,​പൂവാർ നിന്ന് കാഞ്ഞിരംകുളം വഴി തമ്പാനൂരിലേക്കുള്ള ബസ് എല്ലാ ദിവസവും കൃത്യമായി സർവീസ് നടത്തുന്നുണ്ട്.

മണലിവിള,​ഓലത്താന്നി,​കൊടങ്ങാവിള,​കമുകിൻകോട്,​അവണാകുഴി എന്നീ പ്രദേശത്തുള്ളവർക്ക് നഗരത്തിലെത്താനുള്ള ഏക ആശ്രയമാണ് ഈ ബസ് സർവീസ്.ബസില്ലാത്തപ്പോൾ നെയ്യാറ്റിൻകര റൂട്ടിലുള്ള ബസിൽ കയറി മൂന്നുകല്ലുമ്മൂട്,​ അവണാകുഴി,​കാഞ്ഞിരംകുളം,​വഴിമുക്ക് എന്നിവിടങ്ങളിൽ ഇറങ്ങി അവിടെനിന്ന് വേണം തിരുവനന്തപുരത്തേക്ക് പോകാൻ.ഈ യാത്ര ദുഷ്കരമാണെന്ന് നാട്ടുകാർ പറയുന്നു.

വരുമാനം കുറവെന്ന്

അവധി ദിവസങ്ങളിൽ വരുമാനം കുറവയതിനാലാണ് സർവീസ് നടത്താത്തതെന്ന് കെ.എസ്.ആർ.ടി.സി അധികൃതർ വിശദീകരിച്ചു.കിലോമീറ്ററിന് 28 രൂപയെങ്കിലും ലഭിച്ചാലേ നഷ്ടമില്ലാതെ സർവീസ് നടത്താനാകൂവെന്നാണ് അധികൃതരുടെ നിലപാട്.

സമയംതെറ്റി നെയ്യാറ്റിൻകര ഡിപ്പോയും

അടിമലത്തുറ - കാഞ്ഞിരംകുളം - നെയ്യാറ്റിൻകര ബസുകൾ അവധി ദിവസങ്ങളിൽ കൃത്യസമയം പാലിക്കാറില്ല. അതിനാൽ പലപ്പോഴും രണ്ട് ബസുകൾ ഒരേസമയത്ത് സ‌ർവീസ് നടത്തുന്നത് പതിവാണെന്ന് യാത്രക്കാർ പറയുന്നു.മണിക്കൂറോളം ബസിനായി കാത്തുനിൽക്കേണ്ട സ്ഥിതിയുമാണ്.