വർക്കല: വടശ്ശേരിക്കോണം ജംഗ്ഷനിൽ പ്രവർത്തിക്കുന്ന 'ടെക്സ് വാലി' ടെക്സ്റ്റൈയിൽസിൽ ബുധനാഴ്ച ഉച്ചയോടെ തീപിടിത്തമുണ്ടായി.കെട്ടിടത്തിന്റെ മുകളിലത്തെ നിലയിൽ ചെറിയ തോതിലുണ്ടായ തീ നിമിഷങ്ങൾക്കകം ആളികത്തുകയായിരുന്നു.സ്ഥാപനത്തിലെ വസ്ത്രശേഖരം പൂർണമായും അഗ്നിക്കിരയായി. തീപിടുത്തത്തെ തുടർന്നുണ്ടായ പുകയിൽ ജീവനക്കാർക്ക് ശ്വാസതടസമുണ്ടായി.

ജീവനക്കാർ ഓടി പുറത്തേയ്ക്കിറങ്ങിയതിനാൽ ആളപായമൊഴിവായി.തൊട്ടടുത്ത് പ്രവർത്തിക്കുന്ന സ്ഥാപനങ്ങളിലും പുക നിറഞ്ഞു.തമിഴ്നാട് സ്വദേശികളാണ് വർഷങ്ങളായി സ്ഥാപനം നടത്തുന്നത്.ലക്ഷങ്ങളുടെ നാശനഷ്ടമാണ് ഉണ്ടായത്.വർക്കല,ആറ്റിങ്ങൽ,കിളിമാനൂർ മേഖലകളിൽ നിന്നുള്ള ചെറുകിട വ്യാപാര സ്ഥാപനങ്ങൾ ഇവിടെ നിന്നാണ് വസ്ത്രങ്ങളെടുത്ത് വില്പന നടത്തുന്നത്. വലിയ തോതിൽ സ്റ്റോക്കും സ്ഥാപനത്തിലുണ്ടായിരുന്നു. വർക്കല, കല്ലമ്പലം,ആറ്റിങ്ങൽ യൂണിറ്റുകളിലെ ഫയർ ആൻഡ് റെസ്ക്യൂ ടീമുകൾ സ്ഥലത്തെത്തിയാണ് തീ നിയന്ത്രണ വിധേയമാക്കിയത്.ഷോർട്ട് സർക്യൂട്ടാകാം തീപിടിത്തമുണ്ടാക്കിയതെന്നാണ് ഫയർഫോഴ്സിന്റെ പ്രാഥമിക നിഗമനം.