വെഫേറെർ ഫിലിംസ് നിർമ്മാണം

ആർ.ഡി.എക്‌സിന്റെ വൻ വിജയത്തിനുശേഷം നഹാസ് ഹിദായത്ത് സംവിധാനം ചെയ്യുന്ന ചിത്രത്തിൽ ദുൽഖർ സൽമാൻ നായകൻ. വേഫേറെർ ഫിലിംസ് ആണ് നിർമ്മാണം. മേയ് 3ന് ചിത്രത്തെക്കുറിച്ചുള്ള പ്രഖ്യാപനം ഉണ്ടാകും . കിംഗ് ഒഫ് കൊത്തക്കു ശേഷം ദുൽഖർ സൽമാൻ മലയാളത്തിൽ അഭിനയിച്ചിട്ടില്ല. ദുൽഖർ സൽമാനും യുവ സംവിധായകരിൽ ശ്രദ്ധേയനായ നഹാസ് ഹിദായത്തും ആദ്യമായി ഒരുമിക്കുന്നതിന്റെ ആവേശത്തിലാണ് ആരാധകർ. കഴിഞ്ഞ ഓണത്തിന് ബോക്‌സ് ഓഫീസിൽ വൻ കുതിപ്പ് നടത്തിയ ചിത്രമായിരുന്നു ആർ.ഡി.എക്‌സ്. ഓണം റിലീസായിരുന്നു കിംഗ് ഒഫ് കൊത്തയും . വേഫേറെർ ഫിലിംസിന്റെ ബാനറിൽ ദുൽഖർ സൽമാൻ ആണ് കിംഗ് ഒഫ് കൊത്ത നിർമ്മിച്ചത്. അതേസമയം മണിരത്നം - കമൽഹാസൻ ചിത്രം തഗ് ലൈഫ്, വെങ്കി അറ്റ്ലൂരിയുടെ ലക്കി ഭാസ്കർ, ബ്ളാക് ആന്റ് വൈറ്റിൽ ഒരുങ്ങുന്ന കാന്താ എന്നീ ചിത്രങ്ങളിലൂടെ അന്യഭാഷയിൽ സജീവമാണ് ദുൽഖർ, നാഗ് അശ്വിൻ സംവിധാനം ചെയ്യുന്ന പ്രഭാസ് ചിത്രം കൽക്കി 2898 എഡിയിലും അഭിനയിക്കുന്നുണ്ട്. കിംഗ് ഒഫ് കൊത്തക്കുശേഷം സൗബിൻ ഷാഹിർ സംവിധാനം ചെയ്യുന്ന ചിത്രത്തിൽ അഭിനയിക്കാനായിരുന്നു ദുൽഖറിന്റെ തീരുമാനം . ഒാതിരം കടകം എന്ന പേരിൽ ദുൽഖറിനെ നായകനാക്കി ചിത്രം സംവിധാനം ചെയ്യാനാണ് സൗബിൻ ആലോചിച്ചിരുന്നത്.ഒാതിരം കടകത്തിന് മുൻപ് മറ്റൊരു ദുൽഖർ ചിത്രവും സൗബിൻ ആലോചിച്ചു.നഹാസ് ഹിദായത്തിന്റെ ചിത്രത്തിനുശേഷം സൗബിന്റെ ചിത്രത്തിൽ ദുൽഖർ അഭിനയിക്കാനാണ് സാദ്ധ്യത.

ദുൽഖർ ചിത്രത്തിനുശേഷം പൃഥ്വിരാജിനെ നായകനാക്കിയും നഹാസ് ഹിദായത്ത് സിനിമ സംവിധാനം ചെയ്യുന്നുണ്ട്.