കിളിമാനൂർ: മലയാളത്തിലെ ആദ്യ ലക്ഷണയുക്ത നോവലായ ഒ.ചന്തുമേനോന്റെ 'ഇന്ദുലേഖ'യെ ആസ്പദമാക്കി രാജാരവിവർമ്മ വരച്ച ചിത്രത്തിന്റെ പകർപ്പ് ഇനി കിളിമാനൂർ കൊട്ടാരത്തിലെ ചിത്രശാലയിൽ കാണാം. രവിവർമ്മയുടെ 176ാം ജന്മദിനത്തോടനുബന്ധിച്ച് ഇന്നലെ ഡോ. ദിവ്യ എസ്.അയ്യർ ചിത്രം പ്രകാശനം ചെയ്തു. യഥാർത്ഥ ചിത്രം തൃശൂർ കൊരട്ടി സ്വരൂപത്തിൽ പരേതനായ അഡ്വ. കുഞ്ഞുണ്ണി തമ്പാന്റെ മകളും അങ്ങാടിപ്പുറം ആയിരംനാഴി കോവിലകത്ത് പരേതനായ റിട്ട.ജഡ്ജി എ.സി.കുഞ്ഞുണ്ണി രാജയുടെ കൊച്ചുമകളുമായ ഇരിങ്ങാലക്കുട ശശികലയുടെയും മധുസൂദനന്റെയും ലക്ഷ്മി സദനത്തിലാണ് ഇപ്പോഴുള്ളത്. റിട്ട.ജഡ്ജി എ.സി. കുഞ്ഞുണ്ണി രാജയും രവിവർമ്മയുടെ സഹോദരി മംഗളഭായി തമ്പുരാട്ടിയുടെ ചെറുമകൻ ഡോ.ഭാസ്‌കര വർമ്മയും ബന്ധുക്കളായിരുന്നു. കൊട്ടാരത്തിൽ എത്തിയപ്പോൾ കുഞ്ഞുണ്ണിരാജയ്ക്ക് ഭാസ്‌കരവർമ്മ സമ്മാനമായി നൽകിയതാണ് ഈ ചിത്രം.

ചന്തുമേനോന്റെ നിർദ്ദേശപ്രകാരമാണ് ഇന്ദുലേഖയെ രവിവർമ്മ വരച്ചത്. ഇരുവരും സുഹൃത്തുക്കളായിരുന്നു. മുംബയിലെ പ്യൂണ്ടോൾ ആർട്ട് ഗ്യാലറിയിൽ സൂക്ഷിച്ചിരുന്ന രവിവർമ്മയുടെ 'മോഹിനി ' എന്ന ചിത്രം കഴിഞ്ഞ ദിവസം 17 കോടി രൂപയ്ക്ക് ലേലത്തിൽ പോയിരുന്നു.