ഹരിപ്പാട് : ആനവണ്ടി പ്രേമികളുടെ മൊഞ്ചത്തിയാണ് ഹരിപ്പാട് ഡിപ്പോയിലെ ആർ.എസ്.എ 220 ഓർഡിനറി ബസ്. കെ.എസ്.ആർ.ടി.സി ബസുകൾ കല്യാണ ട്രിപ്പുകൾക്ക് അയച്ചുതുടങ്ങിയതോടെ ആർ.എസ്.എ 220നും തിരക്കോട് തിരക്കാണ്.

ആലപ്പുഴ ജില്ലയിൽ ബഡ്ജറ്റ് ടൂറിസം സെല്ലിന്റെ ഭാഗമായി ഏപ്രിൽ 21 മുതൽ മേയ് 5 വരെ ആകെ 15 കല്യാണ ട്രിപ്പുകളാണ് നടന്നത്. ഏറ്റവും കൂടുതൽ ട്രിപ്പുകൾ ഹരിപ്പാട് ( 7) ഡിപ്പോയിൽ നിന്നായിരുന്നു. എടത്വ(4),കായംകുളം(3),ചേർത്തല (1) എന്നീ ഡിപ്പോകളിൽ നിന്നുമായിരുന്നു മറ്റ് ട്രിപ്പുകൾ.

ഹരിപ്പാട് ഡിപ്പോയിൽ ആർ.എസ്.എ 220 എന്ന ബസിനോടാണ് എല്ലാവർക്കും പ്രിയം. ഈ ബസിനെ പൊന്നുപോലെ നോക്കുന്നത് ഡ്രൈവർ ഗിരി ഗോപിനാഥും ഭാര്യയും കണ്ടക്ടറുമായ താര ദാമോദരനുമാണ്. തൃക്കുന്നപ്പുഴ സ്വദേശിയായ ശ്യാം കുമാറിന്റെയും,ചെറിയനാട് സ്വദേശിനിയായ അഖില കൃഷ്ണന്റെയും വിവാഹട്രിപ്പായിരുന്നു ഇന്നലെ ഈ ബസിനുണ്ടായിരുന്നത്. ചെറിയനാട് സുബ്രഹ്മണ്യ സ്വാമി ക്ഷേത്രത്തിൽ വെച്ചായിരുന്നു വിവാഹം.

നാല് മണിക്കൂർ ​യാത്രയ്ക്ക് മിനി ബസിന് ​8000 രൂപ, ഓർഡിനറി ​8500 രൂപ , ഫാസ്റ്റ് പാസഞ്ചർ ​9000 രൂപ, സൂപ്പർ ഫാസ്റ്റ് 9500രൂപ, എക്സ്പ്രസ് 10,000 രൂപ, വോൾവോ എ.സി ​ 11,500 രൂപ, വോൾവോ മൾട്ടി ആക്സിൽ​ 13,000രൂപ, സ്വിഫ്ട് എ.സി 12,000 രൂപ, സ്വിഫ്ട് സ്ലീപ്പർ 15,000 രൂപ എന്നിങ്ങനെയാണ് വിവാഹ ട്രിപ്പുകൾക്ക് കെ.എസ്.ആർ.ടി.സിയുടെ നിരക്ക് .