മാവേലിക്കര: സി.പി.എം മാവേലിക്കര ഏരിയ കമ്മിറ്റിയംഗം, തഴക്കര ലോക്കൽ സെക്രട്ടറി, മാവേലിക്കര ടൗൺ തെക്ക് ലോക്കൽ സെക്രട്ടറി, ഓട്ടോ ടാക്സി ടെമ്പോ ഡ്രൈവേഴ്‌സ് യൂണിയൻ മാവേലിക്കര ഏരിയ വൈസ് പ്രസിഡന്റ്, കർഷകസംഘം ഏരിയ ജോ.സെക്രട്ടറി, കെ.എസ്‌.വൈ.എഫ് മാവേലിക്കര താലൂക്ക് പ്രസിഡന്റ്, സെക്രട്ടറി, ദീർഘകാലം കല്ലുമല സർവീസ് സഹകരണ ബാങ്ക് പ്രസിഡന്റ് എന്നീ നിലകളിൽ പ്രവർത്തിച്ച പി.കെ.ശശിധരന്റെ മൂന്നാം ചരമവാർഷികാചരണം ഇന്ന് തഴക്കരയിൽ നടക്കും. രാവിലെ 8ന് വീട്ടുവളപ്പിലെ സ്മൃതിമണ്ഡപത്തിൽ പുഷ്പാർച്ചന നടക്കും. പതാക ഉയർത്തലിന് ശേഷം ആക്കനാട്ടുകര ചേന്നംവെട്ടത്ത് ജംഗ്ഷനിൽ നടക്കുന്ന അനുസ്മരണ സമ്മേളനം സി.പി.എം മാവേലിക്കര ഏരിയ സെക്രട്ടറി ജി.അജയകുമാർ ഉദ്ഘാടനം ചെയ്യും. എ.ശ്രീജിത്ത് അദ്ധ്യക്ഷനാകും. എസ്.എസ്.എൽ.സി, പ്ലസ്ടു പരീക്ഷകളിൽ ഉന്നതവിജയം നേടിയവരെ സി.പി.എം ജില്ലാ കമ്മിറ്റിയംഗം മുരളി തഴക്കര അനുമോദിക്കും.