ഹരിപ്പാട് :പള്ളിപ്പാട് പേവിഷബാധയേറ്റ് അവശനിലയിലായിരുന്ന കറവപശു ചത്തു. പള്ളിപ്പാട് കോട്ടയ്ക്കകം മങ്ങാട്ട് പുത്തൻവീട്ടിൽ ശാന്തമ്മയുടെ മൂന്ന് പശുക്കളിൽ ഒന്നാണ് കഴിഞ്ഞ ദിവസം രാവിലെ കുഴഞ്ഞ് വീഴുകയും, തുടർന്ന് പേവിബോധയുടെ ലക്ഷണങ്ങൾ കാണിക്കുകയും ഇന്നലെ രാവിലെയോടെ ചത്തുപോകുകയും ചെയ്തത്. ശനിയാഴ്ച രാവിലെ മുതൽ പശു തീറ്റ എടുക്കാതെ വന്നതിനെ തുടർന്ന് പനിയാണന്ന് കരുതി വീട്ടുകാർ പള്ളിപ്പാട് മൃഗാശുപത്രിയിൽ എത്തിയെങ്കിലും ഡോക്ടർ അവധിയിലായിരുന്നു. തുടർന്ന് ഡോക്ടറുമായി ഫോണിൽ സംസാരിച്ച് മരുന്ന് വാങ്ങി നൽകി. ഞായറാഴ്ച പശുവിന്റെ വായിൽ നിന്ന് നുരയും പതയും വരുകയും കൈകാലുകൾ കുടയാനും തുടങ്ങിയതോടെ മുതുകുളത്ത് നിന്ന് മറ്റൊരു ഡോക്ടർ എത്തി നടത്തിയ പരിശോധനയിലാണ് പശുവിന് പേവിഷബാധയാണെന്ന് അറിഞ്ഞത്. ഇതേ തുടർന്ന് പശുവിനെ വീടിനു സമീപത്തെ ആളൊഴിഞ്ഞ പറമ്പിലേക്ക് മാറ്റി കെട്ടിയിരുന്നു. തിങ്കളാഴ്ച രാവിലെ പശു കുഴഞ്ഞു വീഴുകയായിരുന്നു. പേവിഷബാധയേറ്റത് എങ്ങനെയാണെന്ന് സ്ഥിരീകരിക്കാൻ കഴിഞ്ഞിട്ടില്ല.പശുവിനെ പട്ടി കടിച്ചതായുള്ള ലക്ഷണങ്ങളോ മുറിവുകളോ ഒന്നും കാണുന്നില്ല.