ന്യൂഡൽഹി: ലാവ് ലിൻ കേസ് ഇന്നലെ ലിസ്റ്റ് ചെയ്തിരുന്നെങ്കിലും സുപ്രീംകോടതി പരിഗണിച്ചില്ല.35ാമത്തെ തവണയാണ് മാറ്റിവയ്ക്കുന്നത്. അന്തിമവാദത്തിനായി 111ാമത്തെ കേസായി പട്ടികയിലുണ്ടായിരുന്നു. മറ്റു കേസുകളുടെ വാദങ്ങൾ നീണ്ടുപോയതിനാൽ പരിഗണിച്ചില്ല.

രണ്ടാഴ്ചയ്ക്കിടെ നാലാം തവണയാണ് മാറിപോകുന്നത്. ബുധനാഴ്ചയും, മേയ് ഒന്ന് - രണ്ട് തീയതികളിലും സമാനമായിരുന്നു സാഹചര്യം. മേയ് 17ന് മദ്ധ്യവേനൽ അവധിക്കായി അടയ്ക്കുന്ന സുപ്രീംകോടതി, ജൂലായ് എട്ടിനാണ് വീണ്ടും തുറക്കുന്നത്. അതിനാൽ അന്തിമതീർപ്പ് ഇനിയും നീണ്ടുപോകും. മുഖ്യമന്ത്രി പിണറായി വിജയൻ, മുൻ ഊർജ്ജ സെക്രട്ടറി കെ. മോഹനചന്ദ്രൻ,​ മുൻ ജോയിന്റ് സെക്രട്ടറി എ. ഫ്രാൻസിസ് എന്നിവരെ കുറ്റവിമുക്തരാക്കിയ ഹൈക്കോടതി വിധി ചോദ്യം ചെയ്ത് സി.ബി.ഐ സമർപ്പിച്ച അപ്പീലിലാണ് അന്തിമവാദം കേൾക്കേണ്ടത്. പ്രതിപട്ടികയിൽ നിന്ന് തങ്ങളെയും ഒഴിവാക്കണമെന്നാവശ്യപ്പെട്ട് കെ.എസ്.ഇ.ബി. മുൻ ഉദ്യോഗസ്ഥരായ ആർ. ശിവദാസ്,​ കെ.ജി. രാജശേഖരൻ എന്നിവരും ഹർജി സമർപ്പിച്ചിട്ടുണ്ട്.