കൊച്ചി: പൊടിപിടിച്ച് പഴകിയ രാജസ്ഥാൻ പുതപ്പ് നൽകി ഉപഭോക്താവിനെ കബളിപ്പിച്ച വ്യാപാരി 28,000 രൂപ നഷ്ടപരിഹാരം നൽകണമെന്ന് എറണാകുളം ജില്ലാ ഉപഭോക്തൃ തർക്ക പരിഹാര കമ്മി​ഷൻ ഉത്തരവ്. എറണാകുളം കലൂർ സ്വദേശിനി റിനു അശ്വിനാണ് രാജസ്ഥാൻ ജയ്സാൽമറിലെ രാജസ്ഥാൻ ഹാൻഡ്ലൂം ആൻഡ് ഹാൻഡ് ക്രാഫ്റ്റിനെതിരെ കമ്മി​ഷനെ സമീപിച്ചത്.
രാജസ്ഥാനിലെ ജയ്സാൽമർ രാജകുമാരന്റെയും ബികാനീർ രാജകുമാരിയുടെയും പ്രണയകഥ ആലേഖനം ചെയ്ത പുതപ്പി​നും നീല സാരി​ക്കുമായി​രുന്നു ഓൺ​ലൈൻ ഓർഡർ നൽകി​യത്. യഥാക്രമം 2850 രൂപയും 3500 രൂപയും വി​ലയായി അക്കൗണ്ടി​ലേക്ക് നൽകി​. ലഭി​ച്ചത് പഴകി​ പൊടി​യും അഴുക്കും പി​ടി​ച്ച പുതപ്പു മാത്രമാണ്. പരാതി​കൾക്കായി​ വി​ളി​ച്ചപ്പോൾ റി​നുവി​ന്റെയും വീട്ടുകാരുടെയും ഫോൺ​ നമ്പറുകൾ രാജസ്ഥാൻ ഹാൻഡ്ലൂം ബ്ളോക്ക് ചെയ്തു. വക്കീൽ നോട്ടീസുകൾ സ്വീകരി​ക്കാതെ മടക്കി​ അയച്ചു. ഉപഭോക്തൃ കമ്മി​ഷന്റെ നോട്ടീസ് ഇവർ കൈപ്പറ്റി​യെങ്കി​ലും മറുപടി​ അയച്ചി​ല്ല. ഹാജരായതുമി​ല്ല. തുടർന്നാണ് എക്സ് പാർട്ടി​ വി​ധിയുണ്ടായത്.

നഷ്ടപരി​ഹാരത്തി​നൊപ്പം വി​ലയായി​ നൽകി​യ 6,350 രൂപയും മടക്കി​ നൽകണം. 45 ദി​വസത്തി​നകം കൈമാറി​യി​ല്ലെങ്കി​ൽ ലഭ്യമാകുംവരെയുള്ള 9 ശതമാനം പലി​ശയും നൽകണം. വ്യാപാരിയുടെ നടപടി സേവനത്തിലെ വീഴ്ചയും അധാർമ്മിക വ്യാപാര രീതിയുമാണെന്ന് ഉപഭോക്തൃ കമ്മിഷൻ പ്രസിഡൻറ് ഡി.ബി. ബിനു, മെ‌ംബർമാരായ വൈക്കം രാമചന്ദ്രൻ, ടി.എൻ. ശ്രീവിദ്യ എന്നിവരുടെ ബെഞ്ച് കണ്ടെത്തി.

പരാതി​യുണ്ടെങ്കി​ൽ ഓൺ​ലൈനായി​ ഓർഡർ നൽകി​യ സ്ഥലം, ഉപഭോക്താവി​ന്റെ വി​ലാസം, ജോലി​ സ്ഥലം തുടങ്ങി​യ സ്ഥലങ്ങളുടെ പരി​ധി​യി​ലുള്ള തർക്കപരി​ഹാര കമ്മി​ഷനുകളെ സമീപി​ക്കാം. കമ്മി​ഷൻ വി​ധി​ നടപ്പാക്കി​യി​ല്ലെങ്കി​ൽ വ്യാപാരി​ക്കെതി​രെ അറസ്റ്റ് വാറണ്ട് പുറപ്പെടുവി​ക്കാനും സ്വത്തുക്കൾ അറ്റാച്ച് ചെയ്യുവാനും കമ്മി​ഷന് സാധി​ക്കും.

ഡി​.ബി​.ബി​നു

ജി​ല്ലാ ഉപഭോക്തൃ തർക്ക പരി​ഹാര കമ്മിഷൻ പ്രസിഡന്റ്

എറണാകുളം