നെടുമ്പാശേരി: ഭർത്താവിനും ആറ് വയസുകാരനായ മകനുമൊപ്പം സ്കൂട്ടറിൽ സഞ്ചരിക്കുകയായിരുന്ന യുവതി ചരക്കുലോറിയിടിച്ച് മരിച്ചു. ഭർത്താവും മകനും നിസാര പരിക്കുകളോടെ രക്ഷപ്പെട്ടു. ചെങ്ങമനാട് തേയ്ക്കാനത്ത് മുല്ലക്കൽവീട്ടിൽ ഔസേഫ് ബൈജുവിന്റെ ഭാര്യ സിജിയാണ് (38) മരിച്ചത്.

അത്താണി - പറവൂർറോഡിൽ ചുങ്കം പെട്രോൾബങ്കിന് സമീപം ഇന്നലെ വൈകിട്ട് 4.25നായിരുന്നു അപകടം. മൂവരും സിജിയുടെ കുന്നുകര ഐരൂരിലുള്ള വീട്ടിൽപ്പോയി മടങ്ങിവരുമ്പോഴായിരുന്നു അപകടം. മുന്നിൽ സഞ്ചരിച്ച കാർ മുന്നറിയിപ്പില്ലാതെ പൊടുന്നനെ റോഡരികിൽ പാർക്ക് ചെയ്തതോടെ സ്കൂട്ടർ വേഗതകുറച്ച് വലത്തോട്ട് തിരിക്കുന്നതിനിടെ ചരലിൽക്കയറിത്തെന്നി സ്കൂട്ടർ നിയന്ത്രണം വിടുകയായിരുന്നു. ഈ സമയമാണ് സമാന്തരമായെത്തിയ ചരക്കുലോറി തട്ടുകയും സിജി വലത്തോട്ട് വീഴുകയും ചെയ്തത്. സിജിയുടെ ദേഹത്ത് ലോറിയുടെ ടയർ കയറിയിറങ്ങി തത്ക്ഷണം മരിച്ചു. ബൈജുവും കുട്ടിയും ഇടതുവശത്തേക്ക് വീണതിനാൽ നിസാര പരിക്കുകളോടെ രക്ഷപ്പെട്ടു. മൃതദേഹം ആലുവ ജില്ല ആശുപത്രി മോർച്ചറിയിൽ. സംസ്കാരം ഇന്ന് ചെങ്ങമനാട് സെന്റ് ആന്റണീസ് പള്ളി സെമിത്തേരിയിൽ. കുന്നുകര അയിരൂർ പുതുശേരി പൗലോസിന്റെ മകളാണ് സിജി. മക്കൾ: അനറ്റ്, അലോൺസ്.