പറവൂർ: ഐസ് കയറ്റിവന്ന പിക്കപ് വാൻ മൂത്തകുന്നം - മാല്യങ്കര റോഡിൽ തറയിൽ കവല പപ്പടവളവിന് സമീപത്തായി മറിഞ്ഞു. ഇന്നലെ രാവിലെ ഏഴരയോടെയാണ് അപകടം. വളവ് തിരിച്ചപ്പോൾ നിയന്ത്രണം വിട്ടുമറിയുകയായിരുന്നു. വാഹനത്തിൽ മൂന്ന് പേരുണ്ടായിരുന്നു. ഡ്രൈവറുടെ കൈയ്ക്ക് ചെറിയ പരി​ക്കുണ്ട്. മറ്റു രണ്ട് പേർക്ക് പരി​ക്കേൽക്കാതെ രക്ഷപ്പെട്ടു.

വീതികുറഞ്ഞ മൂത്തകുന്നം - മാല്യങ്കര റൂട്ടിലൂടെ മത്സ്യവും മറ്റും കയറ്റി വരുന്ന വാഹനങ്ങൾ അമിതവേഗത്തിൽ ചീറിപ്പായുന്നത് പതിവാണ്. മുനമ്പം ഹാർബറിൽ നിന്നുള്ള മത്സ്യവുമായി വിവിധ ചന്തകളിലേക്കുള്ള ഓട്ടപ്പാച്ചിലാണ് പുലർച്ചെ മുതൽ ഉണ്ടാകുന്നത്. ഒട്ടേറെ വളവും തിരിവുമുള്ള വഴിയിലൂടെ വലിയ കണ്ടെയ്നർ ലോറികളും പോകുന്നുണ്ട്. വാഹനങ്ങളിൽ നി​ന്നുള്ള മലിനജലം റോഡിൽ വീഴുന്നത് ഇരുചക്രവാഹന യാത്രികരെ അപകടത്തിൽപ്പെടുത്തുന്നു. ഇന്നലെ പിക്കപ് വാൻ മറിയുന്നതിന് അര മണിക്കൂർ മുമ്പ് പപ്പടവളവിന് സമീപം തന്നെ ഒരു ഇരുചക്രവാഹന യാത്രികൻ തെന്നിവീണു.