കോലഞ്ചേരി: കേന്ദ്ര വിദ്യാഭ്യാസ മന്ത്രാലയം, മന്ത്രാലയ ഇന്നവേഷൻ സെൽ, എ.ഐ.സി.ടി.ഇ, വാദ്ധ്വാനി ഫൗണ്ടേഷൻ എന്നിവയുടെ സഹകരണത്തോടെ കടയിരുപ്പ് ശ്രീനാരായണ ഗുരുകുലം എൻജിനീയറിംഗ് കോളേജിൽ ദേശീയതലത്തിലെ സമർത്ഥരായ സ്‌കൂൾ കോളേജ് വിദ്യാർത്ഥികളെ പങ്കെടുപ്പിച്ച് നടത്തിയ ഐ.ഡി.ഇ ബൂട്ട് ക്യാമ്പ് സമാപിച്ചു. സമാപന സമ്മേളനത്തിൽ ഗ്ലോബൽ ലാൻഡ് ഇനീഷ്യേ​റ്റീവ് കോ ഓർഡിനേഷൻ ഓഫീസ് ഡയറക്ടർ ഡോ. മുരളി തുമ്മാരുക്കുടി മുഖ്യാതിഥിയായി. സി.ഇ.ഒ ഡോ. ഇ.പി. യശോധരൻ അദ്ധ്യക്ഷനായി.

സംഘാടക സമിതി രക്ഷാധികാരി കെ.കെ. കർണൻ മുഖ്യ പ്രഭാഷണം നടത്തി. ഗുരുകുലം ട്രസ്​റ്റ് സെക്രട്ടറി ആർ. അനിലൻ, കോളേജ് മാനേജർ വി. മോഹനൻ, ട്രഷറർ കെ.എൻ. ഗോപാലകൃഷ്ണൻ, പ്രിൻസിപ്പൽ ഡോ. എസ്. ജോസ്, പ്രോഗ്രാം നോഡൽ ഓഫീസർ സരിം മോയിൻ, വാദ്ധ്വനി ഫൗണ്ടേഷൻ മേഖല വിഭാഗം മേധാവി വിഷ്ണു പ്രിയ പ്രോഗ്രാം കോ ഓർഡിനേ​റ്റർ ഡോ. പ്രതിഭ വർഗീസ് എന്നിവർ സംസാരിച്ചു. ഇന്നവേഷൻ ഡിസൈനും സംരംഭകത്വ കഴിവുകളും പരിപോഷിപ്പിക്കുന്നതിനായി നടത്തിയ ക്യാമ്പിന്റെ മൂന്നാമത് ഫേസിനാണ് കോളേജ് ആതിഥ്യമരുളിയത്. സ്മാർട്ട് ഇന്ത്യ ഹാക്കത്തൺ മത്സരങ്ങളിൽ ഫൈനലിസ്റ്റുകളായ 175 പ്രതിഭകളും ലഡാക്ക്, ജമ്മു കാശ്മീർ എന്നിവിടങ്ങളിൽ നിന്നുള്ള 50 വിദ്യാർത്ഥികളും അടൽ ടിങ്കറിംഗ് ലാബിൽ നിന്നുള്ള 20 സ്‌കൂൾ വിദ്യാർത്ഥികളും അദ്ധ്യാപകരും ഉൾപ്പെടെ 300ലേറെപ്പേർ പങ്കെടുത്തു.