കൊച്ചി: ദേശീയ കാർഷിക- ഗ്രാമ വികസന ബാങ്ക് വഴി ക്ഷീര കർഷകർക്ക് വായ്പ നൽകുന്നെന്ന പ്രചാരണം വ്യാജമാണെന്ന് നബാർഡ് അറിയിച്ചു. ക്ഷീരസംരംഭകത്വ വികസനപദ്ധതിയുടെ (ഡി.ഇ.ഡി.എസ് ) കീഴിൽ കർഷകർക്ക് നേരിട്ട് വായ്പ നൽകുന്നുവെന്ന് തെറ്റിദ്ധരിക്കപ്പെട്ട നിരവധി അപേക്ഷകൾ വരുന്ന സാഹചര്യത്തിലാണ് വിശദീകരണം.

സുസ്ഥിര ഗ്രാമവികസനത്തിനായി കാർഷികമേഖലയിലുൾപ്പെടെ പ്രവർത്തിക്കുന്ന ധനകാര്യ സ്ഥാപനങ്ങൾക്കും സഹകരണ സ്ഥാപനങ്ങൾക്കും സാമ്പത്തികസഹായവും പിന്തുണയും നൽകുന്ന നബാർഡ് വ്യക്തികൾക്കോ കർഷകർക്കോ നേരിട്ട് വായ്പകൾ ലഭ്യമാക്കുന്നില്ല. യഥാർത്ഥ വിവരങ്ങൾക്കും മറ്റ് സേവനങ്ങൾക്കുമായി www.nabard.org എന്ന വെബ്സൈറ്റ് സന്ദർശിക്കണമെന്ന് അധികൃതർ അറിയിച്ചു.