കൊച്ചി​: സോഷ്യലിസ്റ്റ് പാർട്ടി​ ദേശീയ പ്രസി​ഡന്റും പ്രമുഖ ട്രേഡ് യൂണി​യൻ നേതാവുമായ തമ്പാൻ തോമസ് ശതാഭിഷേക നിറവിൽ. മേയ് 11ന് അദ്ദേഹത്തിന് 84 വയസ് തികയും. ആഘോഷങ്ങളില്ല. എറണാകുളം ജനറൽ ആശുപത്രിക്കരികെ മാർക്കറ്റ് റോഡിലെ വീട്ടിൽ രാവിലെ 11ന് സുഹൃത്തുക്കളും സഹപ്രവർത്തകരും ചേർന്ന് കേക്ക് മുറിക്കും.

18-ാം വയസി​ൽ തുടങ്ങി​യ സംഭവബഹുലമായ പൊതുജീവി​തമാണ് തമ്പാൻ തോമസി​ന്റേത്. രാഷ്ട്രീയ - ട്രേഡ് യൂണി​യൻ നേതാവ്, പാർലമെന്റംഗം, സഹകാരി​, അഭി​ഭാഷകൻ തുടങ്ങി​യ മേഖലകളി​ലെ സംശുദ്ധമായ സംഭാവനകളാണ് അദ്ദേഹത്തി​ന്റെ പ്രത്യേകത.

1940ൽ തി​രുവല്ലയി​ൽ ജനി​ച്ച് ആലുവ യു.സി​ കോളേജി​ലും എറണാകുളം ലാ കോളേജി​ലും പഠി​ച്ച് ഹൈക്കോടതി​യി​ൽ അഭി​ഭാഷക ജീവി​തത്തി​നും സോഷ്യലി​സ്റ്റ് പാർട്ടി​യി​ലൂടെ രാഷ്ട്രീയജീവി​തത്തിനും തുടക്കമി​ട്ടു. 17 വർഷത്തോളം എറണാകുളം ജി​ല്ലാ സഹകരണ സൊസൈറ്റി​ പ്രസി​ഡന്റുമായി​രുന്നു. അടിയന്തരാവസ്ഥയിൽ 18 മാസം ജയി​ൽവാസമനുഷ്ഠി​ച്ചു. ജയപ്രകാശ് നാരായണൻ, ഡോ. റാം മനോഹർ ലോഹ്യ, ആചാര്യ കൃപലാനി, ജോർജ് ഫെർണാണ്ടസ്, മധു ദന്തവതെ, എസ്. ചന്ദ്രശേഖർ, വി.പി. സിംഗ് തുടങ്ങിയവർക്കൊപ്പം സജീവമായി​രുന്നു.

ഇന്ത്യയിലെ പ്രമുഖ കേന്ദ്ര ട്രേഡ് യൂണിയൻ സംഘടനയായ എച്ച്.എം.എസിന്റെ ദേശീയ പ്രസിഡന്റായും പ്രവർത്തി​ച്ചു. 1984ലാണ് മാവേലി​ക്കരയി​ൽ നി​ന്ന് ജനതാദൾ സ്ഥാനാർത്ഥി​യായി​ പാർലമെന്റി​ലെത്തി​യത്. 'തൂലിക, തൂമ്പ, ജയിൽ പിന്നെ പാർലമെന്റും" എന്ന ആത്മകഥയും രചി​ച്ചി​ട്ടുണ്ട്. നാല്പതിലേറെ ലോകരാഷ്ട്രങ്ങളിൽ അന്തർദേശീയ സമ്മേളനങ്ങളി​ൽ തൊഴിലാളി പ്രതിനിധിയായി പങ്കെടുത്തു.