പെരുമ്പാവൂർ: നിരവധി മോഷണക്കേസുകളിൽ പ്രതിയായ ട്രിച്ചി ലാൽഗുഡി മനയ്ക്കൽ അണ്ണാനഗർ കോളനിയിൽ ധർമ്മരാജി (29) നെ പെരുമ്പാവൂർ എ.എസ്.പിയുടെ നേതൃത്വത്തിലുള്ള പ്രത്യേക അന്വേഷണസംഘം അറസ്റ്റ് ചെയ്തു. ഈ മാസം ഒന്നിന് പെരുമ്പാവൂർ മാവിൻചുവട് ഭാഗത്തു നിന്ന് ബുള്ളറ്റ് മോട്ടോർസൈക്കിൾ മോഷ്ടിച്ച കേസിലാണ് അറസ്റ്റ്. കഴിഞ്ഞ രാത്രി വട്ടയ്ക്കാട്ടുപടിയിൽ പുതിയ മോഷണത്തിന് തയ്യാറെടുക്കവേ പിടികൂടുന്നതിനിടയിൽ പൊലീസിനെ ആക്രമിച്ച് രക്ഷപ്പെടാൻ ശ്രമിച്ച പ്രതിയെ സാഹസികമായി പിന്തുടർന്ന് പിടിക്കുകയായിരുന്നു.

മൂവാറ്റുപുഴ, വെങ്ങോല എന്നിവിടങ്ങളിൽ നിന്ന് ഒരോ പൾസർ ബൈക്കുകളും മോഷ്ടിച്ചതായി പ്രതി പൊലീസിനോട് സമ്മതിച്ചു. ഗുരുവായൂർ സ്റ്റേഷൻ പരിധിയിൽ നിന്ന് 300 പവൻ മോഷ്ടിച്ച കേസിൽ രണ്ടു വർഷത്തോളം ജയിലിൽ കിടന്ന പ്രതി ഏപ്രിൽ രണ്ടിനാണ് പുറത്തിറങ്ങിയത്. കേരളത്തിലും തമിഴ്നാട്ടിലുമായി 40 മോഷണക്കേസുകളിൽ പ്രതിയാണ്. എ.എസ്.പി മോഹിത് റാവത്ത്, ഇൻസ്പെക്ടർ എം.കെ രാജേഷ്, സബ് ഇൻസ്പെക്ടർമാരായ ടോണി ജെ. മറ്റം, എൻ.പി ശശി തുടങ്ങിയവരുടെ നേതൃത്വത്തിലായിരുന്നു അറസ്റ്റ്.