* അസാം സ്വദേശി പിടിയിൽ

പെരുമ്പാവൂർ: പതിനായിരങ്ങൾ വിലവരുന്ന നിരോധിത പുകയില ഉത്പന്നങ്ങൾ പെരുമ്പാവൂരിൽ പിടികൂടി. ജില്ലാ പൊലീസ് മേധാവി ഡോ. വൈഭവ് സക്‌സേനയുടെ മേൽനോട്ടത്തിലുള്ള പ്രത്യേകടീമാണ് സ്‌പെഷ്യൽ പരിശോധന നടത്തിയത്. സ്വകാര്യബസ് സ്റ്റാൻഡ് പരിസരത്ത് നിന്നാണ് പുകയിലശേഖരം കണ്ടെത്തിയത്. ഇതുമായി ബന്ധപ്പെട്ട് അസാം നൗഗാവ് സ്വദേശി നാക്കിബുർ റഹ്മാനെ (22) പൊലീസ് അറസ്റ്റുചെയ്തു. അസാമിൽ നിന്ന് കൊണ്ടുവന്ന് രഹസ്യമായി വില്പന നടത്തിവരികയായിരുന്നു. വൻ തുകയ്ക്ക് അന്യസംസ്ഥാനത്തൊഴിലാളികൾക്കിടയിലായിരുന്നു വില്പന.

* കഞ്ചാവുമായി പിടിയിൽ

മഞ്ഞപ്പെട്ടി ജംഗ്ഷനിൽനിന്ന് മൂർഷിദാബാദ് സ്വദേശിനി ഷക്കീന ഖാത്തൂനെ (40) കഞ്ചാവുമായി പിടികൂടി. വില്പനയ്ക്ക് പൊതികളിലാക്കി വാനിറ്റി ബാഗിലാക്കിയാണ് സൂക്ഷിച്ചിരുന്നത്. 23,500രൂപയും കണ്ടെടുത്തു.

കഴിഞ്ഞദിവസം 93കുപ്പി ഹെറോയിനുമായി അസാം സ്വദേശി പെരുമ്പാവൂർ പൊലീസിന്റെ പിടിയിലായിരുന്നു. മയക്കുമരുന്നിനെതിരെ എസ്.പിയുടെ നേതൃത്വത്തിൽ റൂറൽ ജില്ലയിൽ ഓപ്പറേഷൻ ക്ലീൻ എന്ന പേരിൽ കർശന പരിശോധനയാണ് നടക്കുന്നത്. ഇതിന്റെ ഭാഗമായി ഒരു മാസത്തിനുള്ളിൽ മുന്നൂറിലേറെഗ്രാം എം.ഡി.എം.എയും പതിനേഴ് കിലോ കഞ്ചാവും പതിനഞ്ച് ഗ്രാം ഹെറോയിനും ലക്ഷങ്ങൾ വിലവരുന്ന നിരോധിത പുകയില ഉത്പന്നങ്ങളും പിടികൂടിയിരുന്നു.