മൂവാറ്റുപുഴ: പേപ്പട്ടി ആക്രമണത്തിന്റെ പശ്ചാത്തലത്തിൽ മൂവാറ്റുപുഴ നഗരസഭ ആരംഭിച്ച പ്രതിരോധ പ്രവർത്തനങ്ങളെ അട്ടിമറിക്കാനുള്ള മൃഗ സ്നേഹി സംഘടനയുടെ നീക്കം അപലപനീയമെന്ന് നഗരസഭാ ചെയർമാൻ പി.പി. എൽദോസ് പറഞ്ഞു. കഴിഞ്ഞ 9ന് വളർത്തുനായയുടെ ആക്രമണത്തിൽ

9 പേർക്കും നിരവധി വളർത്തു മൃഗങ്ങൾക്കും കടിയേറ്റിരുന്നു. നാലുദിവസത്തിന് ശേഷം ചത്തുപോയ നായക്ക് പേ വിഷബാധ സ്ഥിരീകരിച്ച സാഹചര്യത്തിലാണ് ഊർജിത പ്രതിരോധ പ്രവർത്തനം ആരംഭിച്ചത്. മേഖലയിലെ തെരുവ് നായ്ക്കളെ പിടികൂടി പ്രതിരോധ കുത്തിവയ്പ് നൽകി 15 ദിവസത്തെ നിരീക്ഷണത്തിനായി ഷെൽട്ടറിൽ അടച്ചിരിക്കുകയാണ്.

ഇതോടൊപ്പം നഗരത്തിലെ മുഴുവൻ തെരുവുനായകൾക്കും പ്രതിരോധ കുത്തിവയ്പ് നടത്തിവരുന്നു. അനിമൽ വെൽഫെയർ ബോർഡിന്റെ മാർഗനിർദ്ദേശ പ്രകാരമാണ് നടപടി. നിരീക്ഷണത്തിനായി പാർപ്പിച്ചിരിക്കുന്ന തെരുവുനായ്കൾക്ക് കൃത്യമായി ഭക്ഷണവും വെള്ളവും നല്കുന്നുണ്ട്. യാഥാർത്ഥ്യം ഇതായിരിക്കെ നഗരസഭയുടെ പ്രതിരോധ പ്രവർത്തനങ്ങളെ അട്ടിമറിക്കാൻ മൃഗസ്നേഹികളെന്ന പേരിൽ ചിലർ രംഗത്ത് വന്നിരിക്കുകയാണ്.

പ്രതിരോധ പ്രവർത്തനങ്ങൾക്ക് നേതൃത്വം നൽകുന്ന വെറ്ററിനറി സർജൻ ഡോ. കൃഷ്ണദാസിനെ സമൂഹ മാധ്യമങ്ങൾ വഴിയും ഫോൺ വഴിയും ചിലർ ഭീഷണിപ്പെടുത്തുന്നു. അനിമൽ വെൽഫെയർ ബോർഡിനും മറ്റും വ്യാജ പരാതി നൽകി പ്രവർത്തനം തടസപ്പെടുത്താനുളള നീക്കവുമുണ്ട്. തെറ്റായ വിവരങ്ങൾ പ്രചരിപ്പിക്കുകയാണ് ഇക്കൂട്ടർ.

കേന്ദ്ര അനിമൽ വെൽഫെയർ ബോർഡ് അംഗം സജന ഫ്രാൻസിസ് പ്രതിരോധ പ്രവർത്തനങ്ങളിൽ സംതൃപ്തി അറിയിച്ചിട്ടുണ്ട്. കൃത്യമായ നിരീക്ഷണത്തിനു ശേഷം മാത്രം ഷൽട്ടറിൽ അടച്ചിട്ടുള്ള തെരുവുനായ്ക്കളെ വിട്ടയച്ചാൽ മതിയെന്ന നിർദ്ദേശവും നഗരസഭയ്ക്ക് നൽകിയിട്ടുണ്ട്.

സ്വാർത്ഥ താത്പര്യങ്ങൾക്കുവേണ്ടി ജനങ്ങളെ കുരുതി കൊടുക്കാനുള്ള നീക്കത്തിൽ നിന്ന് മൃഗസ്നേഹികൾ പിന്മാറണമെന്നും നഗരസഭ നടത്തുന്ന പ്രവർത്തനങ്ങളുമായി സഹകരിക്കാൻ എല്ലാവരും

തയാറാകണമെന്നും ചെയർമാൻ അഭ്യർത്ഥിച്ചു.

ജനങ്ങളുടെ ഭീതി അകറ്റുകയും അവരുടെ സുരക്ഷ ഉറപ്പുവരുത്തുകയും ചെയ്യുകയാണ് മുഖ്യം. മൃഗങ്ങൾക്ക് ദോഷം ഉണ്ടാക്കാതെ നടത്തുന്ന പ്രവർത്തനങ്ങൾ തടസപ്പെടുത്താൻ മൃഗസ്നേഹി സംഘടനകൾക്ക് അധികാരമില്ല. വെറ്റിനറി സർജനും പ്രതിരോധ പ്രവർത്തകർക്കും നേരെ നടത്തുന്ന ഭീഷണി അംഗീകരിക്കാനാവില്ല.

സജന ഫ്രാൻസിസ്

കേന്ദ്ര അനിമൽ വെൽഫെയർ ബോർഡ് അംഗം

പ്രതിരോധ പ്രവർത്തനങ്ങൾ അട്ടിമറിക്കാനുള്ള നീക്കം ഉപേക്ഷിക്കണം. വെറ്ററിനറി സർജൻ അടക്കമുള്ളവരെ ഭീഷണിപ്പെടുത്തുന്നവർക്കെതിരെ നിയമ നടപടി സ്വീകരിക്കും.

പി.പി. എൽദോസ്

നഗരസഭാ ചെയർമാൻ

മൂവാറ്റുപുഴ