ആലുവ: പെൺവേഷം ധരിച്ചെത്തി യാത്രക്കാരന്റെ ബാഗ് കവർന്ന കേസിൽ ആസാം താസ്പൂർ സ്വദേശി അസദുൽ അലി (22) യെ ആലുവ പൊലീസ് അറസ്റ്റ് ചെയ്തു. 28ന് രാത്രി 11 മണിയോടെ ആലുവ റെയിൽവേ സ്റ്റേഷന് സമീപമാണ് സംഭവം. നെടുമ്പാശേരിയിൽ ജോലി ചെയ്യുന്ന മലപ്പുറം സ്വദേശി സുഹൈലിന്റെ ബാഗാണ് സ്ത്രീവേഷം ധരിച്ചെത്തിയ ഇയാളും സംഘവും തട്ടിപ്പറിച്ച് കടന്നുകളഞ്ഞത്. നാട്ടിലേക്ക് പോകുന്നതിന് റയിൽവേ സ്റ്റേഷനിൽ എത്തിയ സുഹൈൽ ഭക്ഷണം കഴിക്കാൻ പോകുമ്പോഴായിരുന്നു സംഭവം. പാസ്‌പോർട്ട്, ഡ്രൈവിംഗ് ലൈസൻസ് തുടങ്ങിയവ ബാഗിലുണ്ടായിരുന്നു. പ്രതിയെ റിമാൻഡ് ചെയ്തു. കൂട്ടു പ്രതികൾക്കായി അന്വേഷണം വ്യാപിപ്പിച്ചു.