ഇടുക്കി: അവധിക്കാലത്ത് വീടുപൂട്ടി യാത്രചെയ്യുന്നവർ അക്കാര്യം പൊലീസിന്റെ മൊബൈൽ ആപ്പ് വഴി അറിയിച്ചാൽ വീട്ടിലും പരിസരത്തും പ്രത്യേക പൊലീസ് നിരീക്ഷണം ഏർപ്പെടുത്തും. ഏപ്രിൽ ഒന്നുമുതൽ മെയ് ആറുവരെ 1231 പേരാണ്‌സംസ്ഥാനത്ത് ഈ സൗകര്യം വിനിയോഗിച്ചത് .
പൊലീസിന്റെ ഔദ്യോഗിക മൊബൈൽ ആപ്പായ പോൽആപ്പ് ഡൗൺലോഡ് ചെയ്തശേഷം അതിലെ ലോക്ക്ഡ് ഹൗസ് ഇൻഫർമേഷൻ എന്ന വിഭാഗത്തിലാണ് ഇതിനായി അപേക്ഷിക്കേണ്ടത്. യാത്ര പുറപ്പെടുന്നതിനു 48 മണിക്കൂർ മുൻപെങ്കിലും ഇങ്ങനെ വിവരം നൽകണം. ഏഴു ദിവസം മുൻപുവരെ വിവരം പോലീസിനെ അറിയിക്കാവുന്നതാണ്. യാത്രപോകുന്ന ദിവസങ്ങൾ, വീട് സ്ഥിതിചെയ്യുന്ന സ്ഥലം, വിലാസം, ബന്ധുവിന്റെയോ അയൽവാസിയുടെയോ പേര്, ഫോൺ നമ്പർ എന്നിവ ആപ്പിൽ നൽകണം. പരമാവധി 14 ദിവസം വരെ വീടും പരിസരവും പൊലീസ് നിരീക്ഷണത്തിലായിരിക്കും. ഗൂഗിൾ പ്ലേസ്റ്റോറിലും ആപ്പ്‌സ്റ്റോറിലും പോൽആപ്പ് ലഭ്യമാണ്.