തൊടുപുഴ: മദ്യപിച്ച് വാഹനമോടിച്ച ബസ് ഡ്രൈവർ അറസ്റ്റിൽ. വെള്ളിയാമറ്റം കൂവക്കണ്ടം സ്വദേശി ജിതീഷ് വിൽസണെയാണ് തൊടുപുഴ ട്രാഫിക് പൊലീസ് പിടികൂടിയത്. ഇന്നലെ രാവിലെ 10ന് വെങ്ങല്ലൂരിലെ സ്വകാര്യ ആശുപത്രിക്ക് സമീപം നടത്തിയ പരിശോധനയിലാണ് ഇയാൾ പിടിയിലായത്. ജിതീഷ് ഓടിച്ചിരുന്ന തൊടുപുഴ– പൂമാല– മൂവാറ്റുപുഴ റൂട്ടിലോടുന്ന മരിയ ബസ് തൊടുപുഴ പൊലീസ് കസ്റ്റഡിയിലെടുത്തു. വകുപ്പുതല നിർദേശത്തെ തുടർന്നാണ് പരിശോധന നടത്തിയതെന്ന് ട്രാഫിക് പൊലീസ് അധികൃതർ പറഞ്ഞു. അറസ്റ്റ് ചെയ്ത ജിതീഷിനെ പിന്നീട് ജാമ്യത്തിൽ വിട്ടയച്ചു. ട്രാഫിക് എസ്‌.ഐമാരായ കെ.ടി. അജയകുമാർ, സാബു സാമുവൽ എന്നിവരുടെ നേതൃത്വത്തിലുള്ള സംഘമാണ് പരിശോധന നടത്തിയത്.