കണ്ണൂർ: സാമൂഹ്യ വിരുദ്ധർക്കെതിരെയും സ്ഥിരം കുറ്റവാളികൾക്കെതിരെയും നടക്കുന്ന സ്‌പെഷ്യൽ ഡ്രൈവിൽ കണ്ണൂർ സിറ്റി പൊലീസ് പരിധിയിൽ ഇതുവരെയായി 306 പേർക്കെതിരെ നടപടി സ്വീകരിച്ചു. സാമൂഹ്യ വിരുദ്ധരെയും സ്ഥിരം കുറ്റവാളികളേയും നിയന്ത്രിക്കുന്നതിനു പൊലീസിന്റെ 'ഓപ്പറേഷൻ ആഗ് ' സ്‌പെഷ്യൽ ഡ്രൈവിലാണ് സ്ഥിരം കുറ്റവാളികൾക്ക് പിടിവീണത്.

ജില്ലയിൽ ഈ മാസം 15 മുതൽ നടക്കുന്ന പരിശോധനയിലാണ് നടപടി. സ്‌പെഷ്യൽ ഡ്രൈവിൽ വിവിധ കുറ്റകൃത്യങ്ങളിൽ ഏർപ്പെട്ട 213 പേർക്കെതിരെയും വാറണ്ട് കേസിൽ പ്രതികളായ 63 പേർക്കെതിരെയും, ഗുരുതര കുറ്റം ചെയ്ത രണ്ട് പേർക്കെതിരെയും കാപ്പ പ്രകാരം ഒരാൾക്കെതിരെയും മറ്റ് ക്രിമിനൽ കേസിൽ ഉൾപ്പെട്ട 27 പേർക്കെതിരെയും അറസ്റ്റ് ഉൾപ്പെടെ നിയമനടപടികൾ സ്വീകരിച്ചു. വരും ദിവസങ്ങളിലും ഇത്തരക്കാർക്കെതിരെ ശക്തമായ നിയമ നടപടികൾ സ്വീകരിക്കുമെന്ന് സിറ്റി പൊലീസ് കമ്മീഷണർ അജിത് കുമാർ അറിയിച്ചു.