കണ്ണൂർ: ഇ.പി. ജയരാജൻ വധശ്രമക്കേസിൽ തന്നെ കുറ്റവിമുക്തനാക്കിക്കൊണ്ടുള്ള ഹൈക്കോടതി വിധിയിൽ വളരെ സന്തോഷമുണ്ടെന്ന് കെ.പി.സി.സി അദ്ധ്യക്ഷൻ കെ.സുധാകരൻ. കഴിഞ്ഞ കുറേക്കാലമായി തന്നെ ക്രിമിനലായി ചിത്രീകരിക്കാൻ കെട്ടുകഥ ഉണ്ടാക്കി വേട്ടയാടിയ പാർട്ടിയാണ് സി.പി.എം. എന്റെ തലയ്ക്കു മുകളിൽ വാൾ കെട്ടിത്തൂക്കിയതുപോലെയായിരുന്നു ഈ കേസ്. ഇല്ലാത്ത കുറ്റത്തിന് പ്രതിയാക്കി, ക്രിമിനലാക്കി, ക്രിമിനൽ ലീഡറാക്കി എന്നെ രാഷ്ട്രീയത്തിൽ നശിപ്പിക്കാനുള്ള ഇടതുപക്ഷത്തിന്റേയും ബി.ജെ.പിയുടേയും നീക്കത്തിനേറ്റ തിരിച്ചടിയാണ് കോടതിവിധി.

എനിക്കൊരു മോചനം കിട്ടിയ വിധിയാണ് ഇത്. കേസ് തുടർന്നും അന്വേഷിച്ച് യഥാർത്ഥ പ്രതികളെ കണ്ടുപിടിക്കേണ്ടത് തന്റെ ഉത്തരവാദിത്വമല്ല. അപ്പീലുമായി സർക്കാർ സുപ്രീം കോടതിയിൽ പോകട്ടെ. പറ്റാവുന്ന രീതിയിലൊക്കെ താനും അവിടെ മത്സരിക്കാം. ഇ.പി.ജയരാജനോട് എന്തെങ്കിലും പറയാനുണ്ടോ എന്ന മാദ്ധ്യമപ്രവർത്തകരുടെ ചോദ്യത്തിന് പാവം ഇ.പി എന്നായിരുന്നു സുധാകരന്റെ മറുപടി.