കോഴിക്കോട് : ഹജ്ജ് തീർത്ഥാടകർക്ക് കരിപ്പൂർ വിമാനത്താവളത്തിൽ നിന്ന് നിശ്ചയിച്ച യാത്രാ നിരക്ക് കുറച്ച് കേരളത്തിലെ മറ്റു വിമാനത്താവളങ്ങളിലെ നിരക്കുമായി ഏകീകരിക്കണമെന്നും മലബാറിൽ നിന്നുള്ള ഹാജിമാർക്ക് കരിപ്പൂരിൽ നിന്ന് യാത്രാ സൗകര്യം ഒരുക്കണമെന്നും കേരള നദ്‌വത്തുൽ മുജാഹിദീൻ (കെ.എൻ.എം) കോഴിക്കോട് സൗത്ത് ജില്ലാ കമ്മിറ്റി എം.എസ്.എസ് ഓഡിറ്റോറിയത്തിൽ സംഘടിപ്പിച്ച ഹജ്ജ് പഠന ക്യാമ്പ് ആവശ്യപ്പെട്ടു. സംസ്ഥാന വൈസ് പ്രസിഡന്റ് ഡോ.ഹുസൈൻ മടവൂർ ഉദ്ഘാടനം ചെയ്തു. ജില്ലാ പ്രസിഡന്റ് സി.മരക്കാരുട്ടി അദ്ധ്യക്ഷത വഹിച്ചു. സി.സലീം സുല്ലമി, അലി ശാക്കിർ മുണ്ടേരി, വളപ്പിൽ അബ്ദുസ്സലാം, പി.മുഹമ്മദ് കോയ, ജുനൈദ് സലഫി, ഹാഫിസ് റഹ്മാൻ എന്നിവർ പ്രസംഗിച്ചു.