കോട്ടയം: ആർട്ടിഫിഷ്യൽ ഇന്റലിജൻസിന്റെ (എ.ഐ) സാദ്ധ്യതകൾ പൊതുവിദ്യാഭ്യാസ മേഖലയിൽ ഫലപ്രദമായി പ്രയോജനപ്പെടുത്താൻ പൊതുവിദ്യാഭ്യാസ വകുപ്പ് കൈറ്റിന്റെ നേതൃത്വത്തിൽ മൂന്നു ദിവസത്തെ പ്രായോഗിക പരിശീലനം ആരംഭിച്ചു. 8 മുതൽ 12 വരെ ക്ലാസുകളിൽ പഠിപ്പിക്കുന്ന 4510 അദ്ധ്യാപകർക്കാണ് പരിശീലനം. ലാപ്‌ടോപ്പും സ്മാർട്ട് ഫോണും ഉപയോഗിച്ചാണ് 25 പേരടങ്ങുന്ന വിവിധ ബാച്ചുകളിലായി അദ്ധ്യാപകർ പരിശീലനത്തിൽ പങ്കെടുക്കുന്നത്. എ.ഐ ടൂളുകൾ ഉപയോഗിക്കുമ്പോൾ സ്വകാര്യത ഉറപ്പാക്കാൻ കൈറ്റ് നൽകിയ ജിസ്യൂട്ട് അക്കൗണ്ടുകൾ ഉപയോഗിക്കും. കൈറ്റിന്റെ വിദഗ്ദ്ധസമിതി പരിശോധിച്ച് നിർദേശിക്കുന്ന എ.ഐ ടൂളുകളായിരിക്കും അതത്‌സമയങ്ങളിൽ പരിശീലനത്തിന് ഉപയാഗിക്കുന്നത്. സെപ്തംബർ, ഡിസംബർ മാസങ്ങളിലായി പ്രൈമറി അദ്ധ്യാപകർക്കും പരിശീലനം നൽകും.