കോട്ടയം: സംസ്ഥാന യുവജനക്ഷേമ ബോർഡിന്റെ യുവമാദ്ധ്യമ ക്യാമ്പ് 22, 23 ,24 തീയതികളിൽ കടുത്തുരുത്തി മാംഗോ മെഡോസിൽ നടക്കും. 'നേരന്വേഷണം' എന്ന പേരിലുള്ള ക്യാമ്പ് 22 ന് ഉച്ചയ്ക്ക് രണ്ടിന് 'ദി ടെലഗ്രാഫ്' ദിനപത്രത്തിന്റെ എഡിറ്റർ അറ്റ് ലാർജ് ആർ. രാജഗോപാൽ ഉദ്ഘാടനം ചെയ്യും. സാമൂഹികപുരോഗതിയിൽ മാദ്ധ്യമങ്ങൾക്കുള്ള സ്വാധീനം, മാദ്ധ്യമ രംഗത്തെ നൂതന പ്രവണതകൾ തുടങ്ങിയവ സംബന്ധിച്ച് യുവജനങ്ങളിലും യുവ മാദ്ധ്യമ പ്രവർത്തകരിലും അവബോധം വളർത്തുക എന്ന ലക്ഷ്യത്തോടെയാണു ക്യാമ്പ് സംഘടിപ്പിക്കുന്നത്. യുവജനക്ഷേമ ബോർഡ് വൈസ് ചെയർമാൻ എസ്. സതീഷ് അദ്ധ്യക്ഷത വഹിക്കും. മൂന്നുദിവസം നീണ്ടു നിൽക്കുന്ന ക്യാമ്പിൽ മുതിർന്ന മാദ്ധ്യമപ്രവർത്തകൻ ശ്രീജിത്ത് ദിവാകരനാണ് ഡയറക്ടർ. മാദ്ധ്യമ രംഗത്തെ പ്രമുഖർ വിവിധ വിഷയങ്ങളിൽ ക്ലാസെടുക്കും. അൻപതോളം പ്രതിനിധികൾ പങ്കെടുക്കും.