ട്രാൻസ്‌ഫോമറുകൾ സ്ഥാപിക്കണമെന്ന് ആവശ്യം

കാഞ്ഞിരപ്പള്ളി: വൈദ്യുതി തകരാർ മൂലം നാട്ടുകാർ സുല്ലിടുകയാണ്. വൈദ്യുതി വരും പോകും... കാഞ്ഞിരപ്പള്ളി നഗരത്തോട് ചേർന്നുള്ള പാറക്കടവ് പത്തേക്കറിലും ശാന്തിനഗറിലും ഇതാണ് അവസ്ഥ. വയ്യാവേലിയായി വോൾട്ടേജ് ക്ഷാമവും. പ്രദേശങ്ങളിൽ വൈദ്യുതി എത്തിച്ചുകൊണ്ടിരിക്കുന്ന പാറക്കടവ് 2, കെ.എം.എ ജംഗ്ഷൻ എന്നിവിടങ്ങളിലെ ട്രാൻസ്‌ഫോമറുകൾ അമിത ലോഡു കാരണം കത്തിനശിച്ചിരുന്നു. ഈ സാഹചര്യത്തിൽ പുതിയ ട്രാൻസ്‌ഫോമറുകൾ സ്ഥാപിക്കണമെന്ന് സി.പി.എം പാറക്കടവ് ബ്രാഞ്ച് കമ്മിറ്റി പ്രമേയത്തിലൂടെ ആവശ്യപ്പെട്ടു. ഇക്ബാൽ ഇല്ലത്തുപറമ്പിലിന്റെ അദ്ധ്യക്ഷതയിൽ ചേർന്ന യോഗം ശ്രീകുമാർ ഉദ്ഘാടനം ചെയ്തു. പി.എസ്. ജയ്സൽ, സി.എ.മസൂദ്, അൻസർ, ഷാജിദ്, ബിജു കരോട്ട് മഠം, റഹീം, മുഹമ്മദ് റാഫി എന്നിവർ പ്രസംഗിച്ചു.

നിവേദനം നൽകും

പാറക്കടവ് പത്തേക്കറിലെയും ശാന്തിനഗറിലെയും വൈദ്യുതി പ്രതിസന്ധി പരിഹരിക്കണമെന്ന് ആവശ്യപ്പെട്ട് കെ.എസ്.ഇ.ബി ഉന്നത അധികാരികൾക്ക് നിവേദനം നൽകാൻ സി.പി.എം പാറക്കടവ് ബ്രാഞ്ച് കമ്മിറ്റി യോഗം തീരുമാനിച്ചു.