പത്തനംതിട്ട: ബൈക്കപകടത്തിന് പിന്നാലെ സുഹൃത്ത് വഴിയിൽ ഉപേക്ഷിച്ച് പോയ 17കാരൻ മരിച്ചു. നെല്ലിക്കാല സ്വദേശിയായ സുധീഷാണ് സംഭവ സ്ഥലത്തുവച്ച് മരിച്ചത്. കഴിഞ്ഞ ദിവസം രാത്രി ഒമ്പത് മണിയോടുകൂടിയായിരുന്നു അപകടം.

അപകടത്തിന് ശേഷം ബൈക്കുമായി കടക്കാൻ ശ്രമിച്ച കുലശേഖരപതി സ്വദേശി സഹദിനെ പൊലീസ് കസ്റ്റഡിയിൽ എടുത്തു. സുധീഷിനെ വീട്ടിൽ നിന്നും വിളിച്ചിറക്കി കൊണ്ടുപോകവേയാണ് അപകടം ഉണ്ടായത്. തലയ്ക്ക് ഗുരുതരമായി പരിക്കേറ്റ സുധീഷിനെ സഹദ് റോഡിൽ ഉപേക്ഷിച്ച് കടന്നുകളയാൻ ശ്രമിക്കുന്ന ദൃശ്യങ്ങൾ സമീപത്തുളള സിസിടിവിയിൽ നിന്നും ആറന്മുള പൊലീസ് കണ്ടെടുത്തിട്ടുണ്ട്. അശ്രദ്ധമായി വാഹനമോടിച്ച് സുധീഷിന്റെ മരണത്തിനിടയാക്കിയതിന് പൊലീസ് സഹദിനെതിരെ കേസ് രജിസ്റ്റർ ചെയ്തിട്ടുണ്ട്.