സ്വന്തമായി ഒരു ബിസിനസ് ആരംഭിക്കുകയെന്നത് മിക്കവരുടെയും മോഹമാണ്. പുതുമയുളള ഒരു ആശയം കൊണ്ടുവന്ന് മിച്ച വരുമാനം നേടാൻ കൊതിക്കാത്തവരായി ആരുംതന്നെ കാണില്ല. പക്ഷേ പല കാരണങ്ങൾ കൊണ്ട് മിക്കവരും ആഗ്രഹങ്ങൾ ഒഴിവാക്കുകയാണ് പതിവ്. ചിലർ മനസിൽ കാണുന്ന പദ്ധതിക്ക് വലിയൊരു തുക ആവശ്യമായതുകൊണ്ട് ആഗ്രഹങ്ങൾ മാറ്റിവയ്ക്കും. എന്നാൽ മറ്റുചിലർ വെല്ലുവിളികൾ നേരിടാനുളള ധൈര്യമില്ലാത്തതിനാലും പദ്ധതികൾ ഒഴിവാക്കും.

ചെറിയ നിക്ഷേപം കൊണ്ട് മികച്ച ഒരു സംരഭകനാകാൻ സാധിക്കുകയാണെങ്കിൽ അതല്ലേ നല്ലത്. വലിയ തുകയ്ക്കായി ബാങ്കുകളിൽ നിന്നും ലഭിക്കുന്ന ലോണിന് പിറകെ നടക്കാതെ കൈവശമുളള ചെറിയ തുക കൊണ്ട് ആരംഭിക്കാവുന്ന കിടിലം ബിസിനസുകൾ പരിചയപ്പെടാം.

1. കെയർടേക്കറാകാം

ഇത് അധികം കേരളത്തിൽ വ്യാപിച്ചിട്ടില്ലാത്ത ഒരു ബിസിനസ് ഐഡിയയാണ്. മിക്കവരും സ്വന്തം വീടുകൾ അടച്ചിട്ട് വിദേശത്തുളള മക്കളുടെയോ അല്ലെങ്കിൽ ദീർഘയാത്രകൾ നടത്തുന്ന ഒരു പ്രവണത നമ്മുടെ നാട്ടിലുണ്ട്. സ്വന്തം വീട് സുരക്ഷിതമാണോയെന്ന സംശയം പലർക്കുമുണ്ടാകാം.

അത്തരത്തിൽ അടച്ചിടുന്ന വീടുകളുടെ സംരക്ഷണം ഏറ്റെടുക്കുന്ന ഒരു സംരഭമാണ്. പ്രാരംഭഘട്ടത്തിൽ ഒരു കമ്പനിയായി രജിസ്റ്റർ ചെയ്യുന്നതിന് മുൻപ് ചെറിയ രീതിയിൽ തുടക്കം കുറിക്കാവുന്നതാണ്. വിജയിച്ചതിന് ശേഷം മാത്രം കൂടുതൽ പേരെ ഇതിന്റെ ഭാഗമാക്കി വരുമാനമുണ്ടാക്കാം. 20,000 രൂപ മുതൽമുടക്കിൽ ഈ സംരംഭം ആരംഭിക്കാവുന്നതാണ്. ശേഷം ഡിജിറ്റൽ മാർക്കറ്റിംഗ് പോലുളള സാദ്ധ്യതകൾ ഉപയോഗിച്ച് ഈ ബിസിനസ് വളർത്തിയെടുക്കാവുന്നതാണ്.

2. മൊബൈൽ ലോണ്ടറി

വിദേശ രാജ്യങ്ങളിൽ സജീവമായി കണ്ടുവരുന്ന ഒരു ആശയമാണിത്. ചെറിയ ഘട്ടത്തിൽ വീടുകളിൽ നിന്നും കഴുകാനുളള വസ്ത്രങ്ങൾ ശേഖരിച്ച് വൃത്തിയാക്കി കൃത്യ സമയത്തിനകം വിതരണം ചെയ്യുന്ന ഈ പദ്ധതി കൂടുതൽ വരുമാനം നേടി തരും. പ്രാരംഭഘട്ടത്തിൽ അധികം മെഷീനുകളുടെ സഹായം തേടാതെ വിലപിടിപ്പുളള വസ്ത്രങ്ങൾ യാതൊരു കേടുപാടും കൂടാതെ കഴുകി ഇസ്തിരിയിട്ട് നൽകുന്നതിലൂടെ വരുമാനമുണ്ടാക്കാം. ഹോസ്റ്റലുകൾ, ആശുപത്രികൾ, ഫ്ലാറ്റുകൾ പോലുളള സ്ഥലങ്ങളെ കേന്ദ്രീകരിച്ച് ആശയം നടപ്പിലാക്കുകയാണെങ്കിൽ വിജയമുറപ്പായിരിക്കും.

3. കണ്ടന്റ് റൈറ്റിംഗ്

മിക്കവർക്കും കേട്ടുകേൾവിയുളള ഒന്നാണിത്. പല വലിയ കമ്പനികളും കണ്ടന്റ് റൈറ്റേഴ്സ് പോസ്റ്റിലേക്ക് ഉദ്യോഗാർത്ഥികളെ തിരഞ്ഞെടുക്കാറുണ്ട്. വിദേശ രാജ്യങ്ങളിൽ പല കമ്പനികൾക്കും കണ്ടന്റ് തയ്യാറാക്കി കൊടുക്കുന്നതിന് പ്രത്യേകം സംഘം തന്നെ പ്രവർത്തിക്കുന്നുണ്ട്. കേരളത്തിൽ ഈ ആശയം അധികമായി വ്യാപിച്ചിട്ടില്ല. വിദഗ്ദ്ധരായ കുറച്ച് പേർ ഇത്തരത്തിൽ ഒരുമിച്ച് പ്രവർത്തിക്കുകയാണെങ്കിൽ കൂടുതൽ വരുമാനം നേടാവുന്നതാണ്. ഐടി പാർക്കുകൾ. ടെക്നോപാർക്കുകൾ പോലുളള സ്ഥലങ്ങളെ ലക്ഷ്യം വച്ച് പദ്ധതി ആരംഭിക്കുകയാണെങ്കിൽ ലാഭം കൊയ്യാവുന്നതാണ്.