ചേർപ്പ് : അതിമാരകവും വീര്യം കൂടിയതുമായ യെല്ലോ മെത്താംഫിറ്റമിൻ എന്ന മയക്കുമരുന്നുമായി രണ്ടു യുവാക്കളെ ചേർപ്പ് എക്‌സൈസ് പിടികൂടി. ചേർപ്പ് വല്ലച്ചിറ മിനി ഗ്രൗണ്ടിന്റെ പരിസരത്ത് നിന്നാണ് അഞ്ച് ഗ്രാം മെത്താംഫെറ്റമിൻ എക്‌സൈസ് കമ്മിഷണറുടെ മദ്ധ്യമേഖല സ്‌ക്വാഡും ചേർപ്പ് എക്‌സൈസും ചേർന്ന് പിടികൂടിയത്.
വല്ലച്ചിറ അങ്ങാടി പറമ്പിൽ അക്ഷയ് അനിൽകുമാർ (23), ചാലക്കുടി പരിയാരം സ്വദേശി അരിങ്ങായി അതുൽ കൃഷ്ണ (21) എന്നിവരെയാണ് പിടികൂടിയത്. പോയിന്റ് അഞ്ച് ഗ്രാം യെല്ലോ മെത്താഫെറ്റമിൻ രണ്ട് രൂപയ്ക്കാണ് ആവശ്യക്കാർക്ക് കൊടുക്കാറെന്ന് പ്രതികൾ പറഞ്ഞു. വല്ലച്ചിറ മിനി ഗ്രൗണ്ടിന് സമീപം യുവാക്കൾ മയക്കുമരുന്ന് ഉപയോഗവും വിൽപ്പനയുമുണ്ടെന്ന വിവരം കിട്ടിയതിന്റെ അടിസ്ഥാനത്തിൽ രഹസ്യ നിരീക്ഷണം നടത്തിയാണ് പ്രതികളെ പിടികൂടിയത്.
എക്‌സൈസ് കമ്മിഷണറുടെ മദ്ധ്യമേഖലാ സ്‌ക്വാഡ് അംഗം ഗ്രേഡ് പ്രിവന്റീവ് ഓഫീസർ എം.കെ.കൃഷ്ണപ്രസാദ്, സന്തോഷ് ബാബു, സിവിൽ എക്‌സൈസ് ഓഫീസർമാരായ പി.ബി.സിജോ മോൻ, ഷെയ്ഖ് അഹമ്മദ്, കൃഷ്ണകുമാർ, എക്‌സൈസ് ഡ്രൈവറായ ഷൈജു എന്നിവരാണ് പ്രതികളെ പിടികൂടിയ സംഘത്തിലുണ്ടായിരുന്നത്.