ലോകം ഡിജിറ്റൽ യുഗമായതോടെ ഇന്ന് എന്തിനും ഏതിനും ഓൺലൈൻ പേയ്‌മെന്റിനെയാണ് മിക്കവരും ആശ്രയിക്കുന്നത്. ഇതിൽ കൂടുതൽ പേരും ഉപയോഗിക്കുന്ന പേയ്‌മെന്റ് ആപ്പ് ഗൂഗിൾ പേയാണ്. ഇപ്പോഴിതാ ഓൺലൈൻ ഇടപാടുകൾ കൂടുതൽ സുഗമമാക്കാൻ മൂന്ന് പുതിയ ഫീച്ചറുകൾ അവതരിപ്പിച്ചിരിക്കുകയാണ് ഗൂഗിൾപേ.
റിവാർഡ് ഫീച്ചർ
പലവിധ ക്രെഡിറ്റ് കാർഡുകളായിരിക്കും മിക്കവരുടെയും കൈവശമുള്ളത്. ഓരോ പ്രാവശ്യം ക്രെഡിറ്റ് കാർഡുകൾ ഗൂഗിൾ പേ വഴി ഉപയോഗിക്കുമ്പോൾ ക്യാഷ്‌ബാക്ക്, ഓഫറുകൾ പോലുള്ള റിവാർഡുകളും ലഭിക്കാറുണ്ട്. എന്നാൽ ഏത് ക്രെഡിറ്റ് കാർഡിനാണ് കൂടുതൽ റിവാർഡുകളും മറ്റും ലഭിക്കുന്നതെന്ന് പലർക്കും അറിവുണ്ടാവുകയില്ല. ഇതിന് സഹായിക്കുന്നതാണ് ഗൂഗിൾ പേ പുതിയതായി അവതരിപ്പിച്ച ഫീച്ചറുകളിലൊന്ന്. ചെക്ക്ഔട്ട് സമയത്ത് ഓരോ കാർഡിന്റെയും റിവാർഡുകൾ പ്രദർശിപ്പിക്കുന്ന ഫീച്ചറാണ് ഗുഗീൾ പേ അവതരിപ്പിച്ചിരിക്കുന്നത്.
ഉപയോക്താക്കൾക്ക് അവരുടെ പർച്ചേസ് അനുസരിച്ച് മികച്ച റിവാർഡുകൾ നൽകുന്ന കാർഡ് ഏതാണെന്ന് പെട്ടെന്ന് തിരിച്ചറിയാൻ സഹായിക്കുന്ന തരത്തിലാണ് ഈ ഫീച്ചർ രൂപകൽപ്പന ചെയ്തിരിക്കുന്നത്. ഇതിനായി ഡെസ്‌ക്‌ടോപ്പിൽ ക്രോമിൽ കയറി കൈവശമുള്ളത് ഏത് കാർഡ് ആണെന്ന് നൽകണം. പിന്നാലെ ഓട്ടോഫിൽ ഡ്രോപ്പ്-ഡൗൺ മെനുവിൽ കാർഡ് റിവാർഡുകളുടെ ഒരു ലിസ്റ്റ് കാണും. ഇത്തരത്തിൽ ഓരോ തവണയും റിവാർഡുകൾ പരിശോധിക്കാതെ തന്നെ ഓരോ കാർഡിനും എന്തൊക്കെ ഓഫറുകൾ ഉണ്ടെന്ന് തിരിച്ചറിയാൻ സാധിക്കും.
ബൈ നൗ പേ ലേറ്റർ (ബിഎൻപിഎൽ)
പർച്ചേസ് നടത്തിയതിനുശേഷം പിന്നീട് പതിയെ തവണകളായി പണമടയ്ക്കാൻ സാധിക്കുന്ന ഫീച്ചറാണ് ബിഎൻപിഎൽ. വലിയ പർച്ചേസുകൾക്കാണ് ഈ ഓപ്‌ഷൻ കൂടുതൽ ഉപകാരപ്പെടുന്നത്. അഫേം ആന്റ് സിപ്പ് എന്ന രണ്ട് ഓപ്ഷനുകൾ ഈ വർഷമാദ്യം ഗൂഗിൾ പേ അവതരിപ്പിച്ചിരുന്നു. പേയ്‌‌മെന്റുകൾ തവണകളാക്കാൻ സഹായിക്കുന്ന ഫീച്ചറാണിത്. ചെറിയ പലിശയോ പലിശയില്ലാതെയോയുള്ള തിരിച്ചടവും അനുവദിക്കുന്നു.
ചെക്ക് ഔട്ട് ചെയ്യുമ്പോൾ, ഉപയോക്താക്കൾക്ക് അവരുടെ നിലവിലുള്ള ബിഎൻപിഎൽ അക്കൗണ്ടുകൾ ലിങ്ക് ചെയ്യാം. അല്ലെങ്കിൽ ഗൂഗിൾ പേയിൽ നേരിട്ട് പുതിയതിനായി സൈൻ ഇൻ ചെയ്യാം. ഉപയോക്താക്കൾക്ക് സൈൻ ഔട്ട് ചെയ്യുകയോ ഒന്നിലധികം വെബ്‌സൈറ്റുകൾ സന്ദർശിക്കുകയോ ചെയ്യാതെ തന്നെ ബിഎൻപിഎൽ ഓപ്ഷനുകൾ പ്രയോജനപ്പെടുത്തുന്നത് എളുപ്പമാക്കുന്നു. ഒരു സാധനം വാങ്ങിക്കഴി‌ഞ്ഞ് ഗൂഗിൾ പേയിലെ ബിഎൻപിഎൽ ഓപ്‌ഷൻ ഉപയോഗിച്ച് തവണകളായി പണമടയ്ക്കാം.
ഓട്ടോഫിൽ ഫീച്ചർ
ഓൺലൈൻ ചെക്ക്ഔട്ട് സമയത്ത് നിങ്ങളുടെ ഷിപ്പിംഗ്, ബില്ലിംഗ്, പേയ്‌മെന്റ് വിശദാംശങ്ങൾ സ്വയമേ നൽകി സമയം ലാഭിക്കാൻ സഹായിക്കുന്ന ഫീച്ചറാണ് ഓട്ടോഫിൽ. ഉപയോക്താക്കളുടെ വ്യക്തി വിവരങ്ങൾ പരിരക്ഷിക്കപ്പെടുന്നുവെന്നും ഈ ഫീച്ചർ ഉറപ്പാക്കുന്നു.
ക്രോമിലോ ആൻഡ്രോയിഡിലോ ഗൂഗിൾ പേ ഉപയോഗിച്ച് ചെക്ക് ഔട്ട് ചെയ്യുമ്പോൾ, നിങ്ങളുടെ കാർഡ് വിശദാംശങ്ങൾ ഓട്ടോഫിൽ ചെയ്യുന്നതിനായി ഫിംഗർപ്രിന്റ് തിരിച്ചറിയൽ, മുഖം സ്‌കാൻ ചെയ്യുന്നത്, സ്‌ക്രീൻ ലോക്ക് പിൻ പോലുള്ള ബയോമെട്രിക് രീതികൾ ഉപയോഗിക്കാം. ഇതിലൂടെ കാർഡിന്റെ സുരക്ഷാ കോഡ് സ്വമേധയാ നൽകേണ്ടതായി വരില്ല.
പർച്ചേസ് കഴിയുമ്പോൾ ഈ ബയോമെട്രിക് രീതികളിലൊന്ന് ഉപയോഗിച്ച് നിങ്ങളുടെ ഐഡന്റിറ്റി നൽകാൻ ഗൂഗിൾ പേ ആവശ്യപ്പെടും. ശേഷം കാർഡ് വിശദാംശങ്ങൾ സ്വയമേവ പൂരിപ്പിക്കും. ഇത്തരത്തിൽ വേഗത്തിലും സുരക്ഷിതമായും പേയ്‌മെന്റുമായി മുന്നോട്ട് പോകാൻ ഗൂഗിൾ പേ ഉപയോക്താക്കളെ അനുവദിക്കുന്നു.