ന്യൂ‌ഡൽഹി: ഇന്ത്യൻ റെയിൽവേയുടെ അത്യാധുനിക വന്ദേ ഭാരത് സ്ലീപ്പർ ട്രെയിനുകൾ ഉടൻ ട്രാക്കിൽ ഇറങ്ങും. സെക്കന്തരാബാദ് - പൂനെ റൂട്ടിലായിരിക്കും ഇന്ത്യയിലെ ആദ്യത്തെ വന്ദേ ഭാരത് സ്ലീപ്പർ ട്രെയിൻ യാത്ര നടത്തുക. ഈ വർഷാവസാനം തന്നെ വന്ദേ ഭാരത് സ്ലീപ്പർ ട്രെയിനുകൾ ട്രാക്കിൽ എത്തുമെന്നാണ് റിപ്പോർട്ട്.
വന്ദേഭാരതിന്റെ സ്ലീപ്പർ കോച്ചുകൾ രാജധാനി എക്സ്പ്രസുകൾക്ക് ബദലായി ഓടുമെന്നാണ് മുൻപ് പുറത്തുവന്ന റിപ്പോർട്ട്. എന്നാൽ സെക്കന്തരാബാദ് - പൂനെ റൂട്ടിലെ മുൻപ് ഓടിക്കൊണ്ടിരുന്ന ശതാബ്ദി എക്‌സ്‌പ്രസിന് പകരമായി വന്ദേ ഭാരത് സ്ലീപ്പർ ട്രെയിൻ വരുമെന്നാണ് പുതിയ വിവരം. നിലവിൽ ശതാബ്ദി എക്സ്പ്രസ് ഏകദേശം എട്ട് മണിക്കൂറും 30 മിനിറ്റും എടുത്താണ് സെക്കന്തരാബാദ് - പൂനെ റൂട്ടിൽ ഓടുന്നത്.
വന്ദേ ഭാരത് സ്ലീപ്പർ ട്രെയിൻ ഈ റൂട്ടിൽ വന്നാൽ യാത്ര സമയം രണ്ട് മണിക്കൂറെങ്കിലും കുറയും. കൂടാതെ യാത്രക്കാർക്ക് കൂടുതൽ സൗകര്യങ്ങളോടെ യാത്ര ചെയ്യാനും കഴിയും. എന്നാൽ സെക്കന്തരാബാദ് - പൂനെ വന്ദേ ഭാരത് സ്ലീപ്പർ ട്രെയിനിന്റെ സമയവും സ്റ്റോപ്പുകളും തീരുമാനിച്ചിട്ടില്ല. സർവീസ് ആരംഭിക്കുന്ന മുറയ്ക്ക് അവ വെളിപ്പെടുത്തുമെന്നാണ് അധികൃതർ അറിയിച്ചത്.
അതേസമയം, കേരളത്തിനായുള്ള മൂന്നാം വന്ദേ ഭാരത് ട്രെയിൻ ഉടൻ എത്തുമെന്ന് നേരത്തെ റിപ്പോർട്ടുകൾ പുറത്തുവന്നിരുന്നു. തിരുവനന്തപുരം - കോയമ്പത്തൂർ , കൊച്ചി - ബംഗളൂരു റൂട്ടുകളായിരിക്കുമെന്നാണ് വിവരം. അടുത്ത മാസം മുതല്‍ സര്‍വീസ് ആരംഭിക്കുമെന്നാണ് റെയില്‍വേ അധികൃതരില്‍ നിന്ന് ലഭിക്കുന്ന സൂചന. ഇതിനിടെ, പുതിയതായി ട്രാക്കിലിറങ്ങുന്ന വന്ദേഭാരത് സ്ലീപ്പർ കോച്ചുകൾ ആദ്യ ഘട്ടത്തിൽ കേരളത്തിലെത്തുമെന്ന് യാത്രക്കാർ പ്രതീക്ഷിച്ചിരുന്നു. നിലവിൽ സംസ്ഥാനത്ത് ഓടുന്ന വന്ദേഭാരത് എക്സ്പ്രസുകൾ ഹിറ്റാണ്. മികച്ച വരുമാനമാണ് രണ്ട് ട്രെയിനുകളും റെയിൽവെയ്ക്ക് നൽകുന്നത്.
സ്ലീപ്പർ കോച്ചുകൾ
രാജ്യത്ത് നിലവിൽ സർവീസ് നടത്തുന്ന പ്രീമിയം ട്രെയിനുകളെ പിന്നിലാക്കി അത്യാധുനിക ഇന്റീരിയറും സൗകര്യങ്ങളുമാണ് വന്ദേഭാരത് സ്ലീപ്പർ കോച്ചുകളിൽ ഒരുക്കുന്നത്. നീണ്ടുനിവർന്ന് വിശാലമായി കിടക്കാൻ കഴിയുന്ന തരത്തിലുള്ള സീറ്റുകൾ, ക്ലാസിക് വുഡൻ ഡിസൈൻ, ആംബിയന്റ് ഫളോർ ലൈറ്റിംഗ്, ടോപ്പ് ലൈറ്റുകൾ എന്നിവ കോച്ചുകളുടെ പ്രത്യേകതയാണ്. അപ്പർ ബർത്തുകളിലേക്ക് കയറാനും ഇറങ്ങാനും പടികളും ഉണ്ട്. ഇത് വൃദ്ധർക്കും സ്ത്രീകൾക്കും ഏറെ പ്രയോജനപ്പെടും. ലഗേജുകൾ സുരക്ഷിതമായി സൂക്ഷിക്കാനുളള സൗകര്യവും ഏർപ്പെടുത്തിയിട്ടുണ്ട്.
റെയിൽവേ മന്ത്രാലയത്തിന് കീഴിൽ പ്രവർത്തിക്കുന്ന ചെന്നെെ ഇന്റഗ്രൽ കോച്ച് ഫാക്ടറി (ഐസിഎഫ്) ഭാരത് എർത്ത് മൂവേഴ്സ് ലിമിറ്റഡും ചേർന്നാണ് വന്ദേ ഭാരത് സ്ലീപ്പർ ട്രെയിൻ നിർമ്മിക്കുന്നത്. നിർമ്മാണം അവസാന ഘട്ടത്തിലാണെന്നാണ് വിവരം.