ദുബായ് : മുഖ്യമന്ത്രി പിണറായി വിജയന്റെ മകൾ വീണാ വിജയന്റെ എക്സാലോജിക് സൊല്യൂഷൻസുമായി ബന്ധമില്ലെന്ന് വ്യക്തമാക്കി ദുബായ് കമ്പനി. എക്സാലോജിക് കൺസൾട്ടിംഗ് കമ്പനിയാണ് വിശദീകരണവുമായി രംഗത്തെത്തിയത്. കമ്പനി സഹസ്ഥാപകരായ സസൂൺ സാദിഖ്,​ നവീൻകുമാർ എന്നിവരാണ് ഇക്കാര്യം വ്യക്തമാക്കിയത്. എസ്.എൻ.സി ലാവ്ലിൻ,​ പി.ഡബ്ലിയുസി കമ്പനികളുമായി ബിസിനസ് ബന്ധമില്ലെന്നും ഇവർ അറിയിച്ചു. എക്സാലോജിക് സൊല്യൂഷൻസ് എന്ന കമ്പനി യു.എ.ഇയിൽ പ്രവർത്തിക്കുന്നില്ലെന്നും ഇരുവരും പറഞ്ഞു. പേറോളിലോ മറ്റേതെങ്കിലും സ്ഥാനത്തോ വീണ,​ സുനീഷ് എന്നിവർ ഇല്ല. യു.എ.ഇ,​ സൗദി അറേബ്യ,​ ബ്രിട്ടൻ,​ ഇന്ത്യ,​ എന്നിവിടങ്ങളിൽ തങ്ങളുടെ കമ്പനികൾ പ്രവർത്തിക്കുന്നു. ഇന്ത്യയിൽ ബംഗളുരുവിലാണ് കമ്പനിക്ക് ബിസിനസ് ഉള്ളതെന്നും ഇവർ പറഞ്ഞു. ആറുമാസമായി വിവാദത്തെക്കുറിച്ച് ധാരണയുണ്ട് . നിയമനടപടികൾ സംബന്ധിച്ച് ഇപ്പോൾ ആലോചിച്ചിട്ടില്ലെന്നും ഇരുവരും വ്യക്തമാക്കി.

വീണാ വിജയന്റെ എക്സാലോജിക് കമ്പനിയുടെ അബുദാബിയിലെ കൊമേഴ്‌സ്യൽ ബാങ്ക് അക്കൗണ്ടിലൂടെ കോടികളുടെ ഇടപാട് നടന്നുവെന്ന് ബി.ജെ.പി നേതാവ് ഷോൺ ജോർജ് ആരോപിച്ചിരുന്നു. അബുദാബി കൊമേഴ്‌സ്യൽ ബാങ്കിൽ എക്സാലോജിക് കൺസൾട്ടിംഗ്,​ മീഡിയ സിറ്റി,​ യു.എ.ഇ എന്ന മേൽവിലാസത്തിലാണ് അക്കൗണ്ടെന്നായിരുന്നു ഷോൺ ജോർജ് പറഞ്ഞത്. വീണയും എം. സുനീഷുമാണ് അക്കൗണ്ട് ഉടമകളെന്നും ഷോൺ ആരോപിച്ചിരുന്നു.