കൊച്ചി: കൊച്ചി മെട്രോയിലെ യാത്രക്കാരിൽ ഏതാണ്ടെല്ലാവരും സ്റ്റേഷനിലെ ചില്ലുപെട്ടിയിൽ ടിക്കറ്റ് കളഞ്ഞാണ് പുറത്തേക്ക് വരുന്നത്. എന്നാൽ ഇതേ ആളുകൾ തന്നെ ഗാർഹിക മാലിന്യം ഉൾപ്പടെ പൊതുസ്ഥലത്ത് വലിച്ചെറിയുകയും ചെയ്യും.
കൊച്ചി നഗരവാസികളാണ് പൊതുസ്ഥലത്ത് മാലിന്യമെറിയുന്നവരിൽ മുൻപന്തിയിൽ. കൊച്ചിക്കാരുടെ സങ്കീർണമായ ഈ മന:ശാസ്ത്രം പഠിക്കാനുള്ള ശ്രമത്തിലായിരുന്നു രണ്ട് ദിവസമായി ജില്ലാ ശുചിത്വ മിഷൻ. ഇതിനായി 28, 29 തീയതികളിൽ സർവേ നടത്തി. ഇനി എക്കണോമിക്‌സ് ആൻഡ് സ്റ്റാറ്റിറ്റിക്‌സും ജില്ലാ ശുചിത്വ മിഷനും ചേർന്ന് ശില്പശാല സംഘടിപ്പിച്ച് സാമ്പിളുകൾ വിശകലനം ചെയ്ത് രണ്ടാഴ്ചയ്ക്കുള്ളിൽ പഠന റിപ്പോർട്ട് തയ്യാറാക്കും. തുടർന്ന് എന്തൊക്കെ രീതിയിലാകണം ഇക്കാര്യത്തിലെ ബോധവത്കരണവും പ്രചാരണവും എന്ന് നിശ്ചയിക്കും.
സർവേയ്ക്ക് മികച്ച പ്രതികരണം ലഭിച്ചു. പൊതു ഇടങ്ങളിലെയും പൊതു ഗതാഗത മാർഗങ്ങളിലെയും മാലിന്യ സംസ്കരണ സംവിധാനങ്ങൾ മെച്ചപ്പെടുത്തുന്നതിനുള്ള നിർദ്ദേശങ്ങളും ലഭിച്ചിട്ടുണ്ട്. ശുചിത്വ മിഷൻ റിസോഴ്സസ് പേഴ്സൺമാരും പ്രൊഫഷണലുകളും വിദ്യാർത്ഥികളും നേതൃത്വം നൽകി. ജില്ലാ എക്കണോമിക് ആൻഡ് സ്റ്റാറ്റിറ്റിക്സ് വകുപ്പിന്റെ റിസർച്ച് ഓഫീസർ കെ.എ. ഇന്ദുവും സംഘവുമാണ് വിവരങ്ങൾ വിശലകലനം ചെയ്യുന്നത്.
2000
• 2000 പേരിൽ നിന്ന് വിവരശേഖരണം
•വിവിധ പ്രായക്കാർ
•വിവിധ തൊഴിൽ മേഖല
• വിവിധ വിദ്യാഭ്യാസ നിലവാരം
10 ഇടങ്ങൾ
• കൊച്ചി മെട്രോ •ലുലു മാൾ •സെൻട്രൽ സ്‌ക്വയർ മാൾ • ഒബ്രോൺ മാൾ • ഫോറം മാൾ • വൈറ്റില ഹബ്ബ് •കുസാറ്റ് • സിവിൽ സ്റ്റേഷൻ •മറൈൻ ഡ്രൈവ് • ഹിൽ പാലസ്
പാഠം ഒന്ന് ശുചിത്വം !
മാലിന്യം വലിച്ചെറിയുന്ന കൊച്ചിക്കാരുടെ സ്വഭാവം കുഞ്ഞുങ്ങളിലൂടെ അടുത്ത തലമുറയിലെങ്കിലും മാറ്റാനാകുമോ എന്ന പരീക്ഷണത്തിലേക്കും ശുചിത്വമിഷൻ കടക്കുകയാണ്. ഇതിന്റെ ഭാഗമായി ജൂൺ മൂന്നിന് സർക്കാർ സ്കൂളുകളിലെ പ്രവേശനോത്സവത്തിന് ഒന്നാം ക്ളാസിലെ കുട്ടികൾക്ക് 'പാഠം ഒന്ന് ശുചിത്വം' എന്ന പേരിൽ നെയിം സ്ളിപ്പുകൾ നൽകും. നോ ടു പ്ളാസ്റ്റിക്, മാലിന്യം എറിയരുത്, കത്തിക്കരുത്, വേർതിരിക്കണം തുടങ്ങി മാലിന്യസംസ്കരണത്തെക്കുറിച്ച് ബോധവത്കരിക്കുന്ന ആറ് തരത്തിലെ നെയിം സ്ളിപ്പുകളാണ് എല്ലാ കുട്ടികൾക്കും നൽകുക.
മാലിന്യം കൈകാര്യം ചെയ്യുന്നവരുടെ സമീപനം അറിഞ്ഞാൽ ഫലപ്രദമായ രീതിയിൽ ബോധവത്കരണവും പ്രചാരണവും നടത്താനാകും. അതിനുള്ള ശ്രമങ്ങളിലാണ് ശുചിത്വ മിഷൻ.
നിഫി എസ്.ഹഖ്
ജില്ലാ കോ ഓർഡിനേറ്റർ
ശുചിത്വമിഷൻ