മല്ലപ്പള്ളി: വായ്പൂര് നെല്ലിമല ചെറുകോൽ പതാലിൽ വീട്ടിൽ ഹൈദ്രോസ് മുസ്ലിയാർ (86),​ ഭാര്യ കുൽസും ബിവി (82) എന്നിവരെ വീടിനുള്ളിൽ മരിച്ചനിലയിൽ കണ്ടെത്തി . മൃതദേഹങ്ങൾക്ക് പത്ത് ദിവസത്തോളം പഴക്കമുള്ളതായി കരുതുന്നു. അയൽവാസികളുമായി ബന്ധമില്ലാത്ത ഇവർ വിവിധയിടങ്ങളിലെ വീടുകൾ കയറി ഭിക്ഷാടനം നടത്തിയാണ് കഴിഞ്ഞിരുന്നത്. പോസ്റ്റ്‌മോർട്ടത്തിന് ശേഷമേ മരണകാരണം വ്യക്തമാകു. വെള്ളിയാഴ്ചകളിൽ വായ്പൂര് പള്ളിയിൽ വരാറുണ്ടായിരുന്ന ഹൈദ്രോസ് കഴിഞ്ഞ വെള്ളിയാഴ്ചയും ഈയാഴ്ചയും എത്തിയില്ല. തുടർന്ന് നടത്തിയ അന്വേഷണത്തിലാണ് മൃതദേഹങ്ങൾ കണ്ടെത്തിയത്. ഇവർക്ക് മക്കളില്ല. പെരുമ്പെട്ടി പൊലീസ് കേസെടുത്തു.