അടൂർ : സ്വകാര്യ ബസ് സ്റ്റാൻഡിൽ പടർന്നുപന്തലിച്ച് നിൽക്കുന്ന വൃക്ഷത്തിന്റെ ശിഖരങ്ങൾ അപകടക്കെണിയാകുന്നു. അടുത്തിടെ ശിഖരങ്ങളിൽ ഒന്ന് യാത്രക്കാർ ഉണ്ടായിരുന്ന സ്വകാര്യ ബസിന്റെ മുകളിലേക്ക് വീണിരുന്നു. വൃക്ഷത്തിന്റെ ശിഖരങ്ങൾ മുറിച്ചുമാറ്റണമെന്ന് ആവശ്യപ്പെട്ട് എസ്.എൻ. ഡി.പി യോഗം അടൂർ യൂണിയൻ ആർ.ഡി.ഒ യ്ക്ക് പരാതി നൽകിയെങ്കിലും ഇതുവരെ നടപടിയെടുത്തിട്ടില്ലെന്ന് യൂണിയൻ കൺവീനർ അഡ്വ. മണ്ണടി മോഹൻ പറഞ്ഞു. അതേസമയം ബസ് കാത്തുനിൽക്കുന്നവർക്ക് തണൽ നൽകുന്ന വലിയ വൃക്ഷം ഒന്നായി വെട്ടിക്കളയരുതെന്ന് പരിസ്ഥിതി പ്രവർത്തകനായ സ്റ്റാൻലി ആനന്ദപ്പള്ളി ആവശ്യപ്പെട്ടു.