പത്തനംതിട്ട : നഗരത്തിലെ സിനിമാ തിയറ്ററിന്റെ രണ്ടാംനിലയിൽ നിന്ന് വീണ് ജീവനക്കാരൻ കൊട്ടാരക്കര നെല്ലിക്കുന്ന് മാവേലി ശ്രീപദ്മം വീട്ടിൽ ഭരത് ജ്യോതി (21) മരിച്ചു. മഴപെയ്ത് പായൽപിടിച്ചതിനാൽ വഴുതി വീണതാകാമെന്നാണ് പൊലീസിന്റെ പ്രാഥമിക നിഗമനം.വ്യാഴാഴ്ച രാത്രി 11.45 നാണ് സംഭവം. ഉടൻതന്നെ സുഹൃത്തുക്കളും സെക്യുരിറ്റി ജീവനക്കാരനും ചേർന്ന് പത്തനംതിട്ട ജനറൽ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. തലയ്ക്ക് ഗുരുതരമായി പരിക്കേറ്റിരുന്നു. പ്രൊജക്ടർ മുറിയിൽ ഭരത് ഉറങ്ങിക്കിടക്കുന്നത് സുഹൃത്ത് കണ്ടിരുന്നു. പിന്നീട് പുറത്തിറങ്ങി ജനലിൽക്കൂടി ഷെയ്ഡിലേക്ക് ഇറങ്ങുന്നത് സി.സി.ടി.വി ദൃശ്യങ്ങളിലുണ്ട്. ഇവിടെയിരുന്ന് ഭരത് ഫോൺ വിളിക്കാറുണ്ടായിരുന്നെന്ന് സുഹൃത്തുക്കൾ പൊലീസിനോട് പറഞ്ഞു. പത്മകുമാർ, സിന്ധു ദമ്പതികളുടെ ഏകമകനാണ്.