കൊല്ലം: സിറ്റി പോലീസ് നടത്തിയ ലഹരി വേട്ടയിൽ ലഹരി വ്യാപാര സംഘത്തിൽ ഉൾപ്പെട്ട രണ്ട് യുവാക്കൾ പിടിയിലായി. മുരുന്തൽ കുപ്പണ്ണ താരനിവാസിൽ അഖിൽ ജിത്ത് ( കിച്ചു , 26), കരുനാഗപ്പള്ളി പുതിയകാവ് ഷീജ മൻസിലിൽ മുഹമ്മദ് റാഫി (24) എന്നിവരാണ് സിറ്റി ഡാൻസാഫ് സംഘവും അഞ്ചാലുംമൂട് പൊലീസും സംയുക്തമായി നടത്തിയ പരിശോധനയിൽ പിടിയിലായത്.

അഞ്ചാലുംമൂട് സി.കെ.പി ജംഗ്ഷന് സമീപത്ത് നിന്നാണ് അഖിൽ ജിത്തിനെ പൊലീസ് പിടികൂടുകയത്. തുടർന്ന് നടത്തിയ ദേഹപരിശോധനയിൽ ഇയാളുടെ പക്കൽ നിന്നും വിൽപ്പനയ്ക്കായി സൂക്ഷിച്ചിരുന്ന 17 ഗ്രാം എം.ഡി.എം.എ കണ്ടെടുത്തു. ചോദ്യം ചെയ്യലിൽ നിന്നാണ് മുഹമ്മദ് റാഫിയെ പറ്റി വിവരം ലഭിച്ചത്. ബാംഗ്ലൂരിൽ നിന്ന് എം.ഡി.എം.എ കടത്തിക്കൊണ്ട് വന്ന് ജില്ലയിൽ വിതരണം നടത്തി വരികയായിരുന്നു ഇയാൾ. കരുനാഗപ്പള്ളിയിലെ വീട്ടിൽ നിന്നാണ് ഇയാളെ അറസ്റ്റ് ചെയ്തത്. അഞ്ചാലുമൂട് പൊലീസ് ഇൻസ്‌പെക്ടർ ശ്രീകാന്ത് മിശ്രയുടെ നേതൃത്വത്തിൽ എസ്.ഐമാരായ രജീഷ്, അനിൽകുമാർ, പ്രതീപ് കുമാർ , സി.പി.ഒമാരായ രാജഗോപാൽ, അനസ് മുഹമ്മദ്, ഡ്രൈവർ എ.എസ്.ഐ അനൂജ് , എസ്.ഐ കണ്ണന്റെ നേതൃത്വത്തിലുള്ള ഡാൻസാഫ് ടീം എന്നിവർ ചേർന്നാണ് പ്രതികളെ പിടികൂടിയത്.