കടയ്ക്കൽ: ഓട്ടോറിക്ഷ ഡ്രൈവറായ ചിതറ പേഴുമൂട് റോഡുവിള വീട്ടിൽ ധർമരാജൻ (സിന്ധുക്കുട്ടൻ-54), ഭാര്യ ദിവ്യ (മായ-43) എന്നിവരെ വീടി​നു സമീപത്തെ റബർ തോട്ടത്തി​ൽ തൂങ്ങി​മരി​ച്ച നി​ലയി​ൽ കണ്ടെത്തി​. രണ്ടു റി​ട്ട. പൊലീസ് പൊലീസ് ഉദ്യോഗസ്ഥരുമായി​ നടത്തി​യ സാമ്പത്തി​ക ഇടപാടി​ലെ ബാദ്ധ്യത സൂചി​പ്പി​ക്കുന്ന ആത്മഹത്യ കുറി​പ്പ് പൊലീസി​ന് ലഭി​ച്ചു.

ഇന്നലെ രാവിലെ 8.30നാണ് ബന്ധുക്കൾ ഇരുവരെയും റബർ മരത്തി​ൽ തൂങ്ങി​നി​ൽക്കുന്ന നി​ലയി​ൽ കണ്ടെത്തി​യത്.

രാവിലെ ബന്ധുക്കളി​ൽ ചി​ലർ ഫോണിൽ ബന്ധപ്പെടാൻ ശ്രമിച്ചെങ്കിലും ലഭിച്ചില്ല. തുടർന്ന് ദിവ്യയുടെ സഹോദരൻ ഷാജിയും ധർമരാജന്റെ സഹോദരന്മാരായ ബാബുവും മോഹനും പേഴുമൂട് പഞ്ചായത്തംഗം സണ്ണിയും വീട്ടിലെത്തി. അടുക്കള ഭാഗത്തെ കതക് ചാരിയ നിലയിലും ബാക്കി മുറികൾ പൂട്ടിയ നിലയിലുമായിരുന്നു. ഒരുപാട് വിളിച്ചെങ്കിലും മറുപടി ഉണ്ടായി​ല്ല. സംശയം തോന്നിയതോടെ ഇവർ തൊട്ടടുത്ത റബർ തോട്ടത്തിലെത്തി​. തുടർന്ന് നടത്തിയ അന്വേഷണത്തിലാണ് മൃതദേഹങ്ങൾ കണ്ടത്. സമീപത്തു നി​ന്ന് രണ്ട് പ്ലാസ്റ്റിക് കസേരകളും തൂങ്ങാൻ ഉപയോഗിച്ച കയറിന്റെ ബാക്കി ഭാഗവും ലഭി​ച്ചു.

അയൽവാസിയെ സഹായി​ക്കാൻ ദി​വ്യ പലി​ശയ്ക്ക് പണം വാങ്ങി​ നൽകി​യി​രുന്നു. എന്നാൽ അയൽവാസി​ പലി​ശയോ മുതലോ തി​രി​കെ നൽകി​യി​ല്ല. 13 വർഷത്തി​നി​ടെ 25 ലക്ഷത്തോളം രൂപയുടെ കടക്കാരി​യായി​ ദി​വ്യ. ഇവർക്ക് പണം നൽകി​യവർ വീട്ടിലെത്തി നിരന്തരം പ്രശ്നം ഉണ്ടാക്കിയിരുന്നതായി നാട്ടുകാർ പറഞ്ഞു. രണ്ട് റിട്ട.പൊലീസ് ഉദ്യോഗസ്ഥരാണ് ഇവരെ ശല്യപ്പെടുത്തിയിരുന്നതെന്നും നാട്ടുകാർ പറയുന്നു. ഇതി​ൽ ഒരു പൊലീസ് ഉദ്യോഗസ്ഥൻ അടുത്തി​ടെ കൊട്ടാരക്കര ഡിവൈ.എസ്.പിക്ക് പരാതി കൊടുത്തതിന്റെ അടിസ്ഥാനത്തിൽ ദമ്പതികളെ ഡിവൈ.എസ്.പി ഓഫീസിലേക്ക് വിളിപ്പി​ച്ചു. തിരിച്ചെത്തിയ ഇരുവരും ദു:ഖി​തരായി​രുന്നുവെന്ന് ബന്ധുക്കൾ പറയുന്നു. മകളെ ബന്ധുവീട്ടിലേക്ക് പറഞ്ഞയച്ച ശേഷമാണ് ആത്മഹത്യ ചെയ്തത്. സംഭവത്തെ കുറിച്ച് ചി​തറ പൊലീസ് അന്വേഷണം ആരംഭി​ച്ചു. മകൻ സോനു അടുത്തിടെയാണ് വിദേശത്തേക്ക് പോയത്. മകൾ സോന പ്ലസ്ടു പഠനം പൂർത്തിയാക്കി ഉപരിപഠനത്തിനൊരുങ്ങുന്നു. മൃതദ്ദേഹം പാരിപ്പള്ളി മെഡി. ആശുപത്രി​യി​ൽ പോസ്റ്റ്മോർട്ടം നടത്തി കടയ്ക്കൽ താലൂക്ക് ആശുപത്രി മോർച്ചറി​യി​ലേക്ക് മാറ്റി. മകൻ ഇന്ന് നാട്ടിലെത്തും. സംസ്കാരം പിന്നീട്.