അങ്കമാലി: അങ്കമാലി റെയിൽവെ സ്റ്റേഷനിൽ ഇലക്ട്രിക് ലൈൻ താങ്ങി നിറുത്തുന്ന വൈദ്യുതി ടവറിൽ കയറി ആത്മഹത്യാ ഭീഷണി മുഴക്കിയ യുവാവിനെ അങ്കമാലി പൊലീസും റെയിൽവെ പൊലീസും ഫയർ ഫോഴ്‌സും ചേർന്ന് അനുനയിപ്പിച്ച് താഴെയിറക്കി. കൊല്ലം ചടയമംഗലം സ്വദേശി ആദിത്യലാലാണ് (23) ടവകറി​ൽ കയറി​യത്. ഇന്നലെ ഉച്ചയ്ക്ക് ഒന്നരയോടെ റെയിൽവേ സ്‌റ്റേഷനിലെ മൂന്നാമത്തെ ട്രാക്കിന് മുകളിലെ ടവറിലാണ് യുവാവ് കയറിയത്. ഈ ട്രാക്കിലൂടെ ചരക്ക് തീവണ്ടികളാണ് കടന്നുപോകുന്നത്. ഇയാൾ കയറിയ ഉടൻ ലൈൻ ഓഫാക്കി. രണ്ടരയോടെയാണ് താഴെയിറക്കിയത്. ചെറിയ മാനസിക അസ്വാസ്ഥ്യം അനുഭവപ്പെടുന്നയാളാണെന്ന് പൊലീസ് പറഞ്ഞു. റെയിൽവെ പൊലീസ് കസ്റ്റഡിയിലെടുത്തു.