എങ്ങണ്ടിയൂർ: 48 മണിക്കൂറിനകം ദേശീയ പാതയിലെ അറ്റകുറ്റപ്പണികൾ പൂർത്തീകരിച്ച് കുടിവെള്ള കണക്ഷൻ പുനഃസ്ഥാപിച്ചില്ലെങ്കിൽ പ്രത്യക്ഷ സമരത്തിലേക്ക് നീങ്ങുമെന്ന് എൻ.കെ. അക്ബർ എം.എൽ.എ.

ഏങ്ങണ്ടിയൂർ പഞ്ചായത്തിലെ കിഴക്കൻമേഖലയായ വി.എസ്. കേരളീയൻ റോഡ് പ്രദേശം ഉൾപ്പെടെയുള്ള 1, 2 ,3 വാർഡുകളിലേക്കുള്ള കുടിവെള്ള പൈപ്പ് ലൈൻ ദേശീയ പാതയുടെ പ്രവർത്തനവുമായി ബന്ധപ്പെട്ട് തകർന്ന നിലയിലാണ്. 15 ദിവസത്തിനകം കണക്‌ഷൻ പുനഃസ്ഥാപിക്കുമെന്ന് അറിയിച്ചെങ്കിലും പൂർത്തീകരിക്കാത്തതിനാൽ ഡെപ്യൂട്ടി കളക്ടറുടെ നേതൃത്വത്തിൽ നടന്ന ചർച്ചയിൽ ഏപ്രിൽ 30 നകം പൂർത്തീകരിക്കുമെന്ന് അറിയിച്ചിരുന്നു.

എന്നാൽ മേയ് ആദ്യവാരം പിന്നിട്ടിട്ടും പ്രവൃത്തി പൂർത്തീകരിക്കാത്തതിനാലാണ് എം.എൽ.എ വാട്ടർ അതോറിറ്റി എക്‌സി. എൻജിനിയർക്ക് അന്ത്യശാസനം നൽകിയത്. ദേശീയ പാതയിലെ നിർമ്മാണ പ്രവൃത്തികൾ തടയുന്നത് ഉൾപ്പെടെയുള്ള നടപടികളിലേക്ക് പോകുമെന്നും ജല അതോറിറ്റി എക്‌സിക്യൂട്ടിവ് എൻജിനിയറെ എം.എൽ.എ അറിയിച്ചു. എക്‌സിക്യൂട്ടിവ് എൻജിനിയറുടെ അദ്ധ്യക്ഷതയിൽ ചാവക്കാട് പി.ഡബ്ലിയു.ഡി റസ്റ്റ് ഹൗസിൽ ചേർന്ന യോഗത്തിലാണ് എം.എൽ.എ കർശന നിർദ്ദേശം നൽകിയത്.

കുടിവെള്ളം മുടങ്ങും

ഏങ്ങണ്ടിയൂരിൽ അറ്റകുറ്റപ്പണി നടക്കുന്നതിനാൽ യു.ഐ.ഡി.എസ്.എസ്.എം.ടി പദ്ധതിയിൽ നിന്നും 3 ദിവസം കുടിവെള്ളം വിതരണം മുടങ്ങും. കുടിവെള്ള ക്ഷാമം രൂക്ഷമായ സാഹചര്യത്തിൽ മണ്ഡലത്തിലെ മുഴുവൻ സ്ഥലത്തേക്കും കുടിവെള്ളം എത്തിക്കുന്നതിനുള്ള വാട്ടർ മാനേജമെന്റ് സംവിധാനം കാര്യക്ഷമമാക്കണമെന്നും യു.ഐ.ഡി.എസ്.എസ്.എം.ടി പദ്ധതി പ്രകാരമുള്ള 13 എം.എൽ.റ്റി ജലവും വിതരണം ചെയ്യുന്നതിലേക്ക് പുതിയ പമ്പ് സ്ഥാപിക്കുന്ന പ്രവൃത്തി അടിയന്തിരമായി പൂർത്തിയാക്കാനും എം.എൽ.എ നിർദ്ദേശം നൽകിയിട്ടുണ്ട്.