ഹരിപ്പാട് : കുട്ടികൾക്കും അദ്ധ്യാപകർക്കും വയറു വേദനയും വയറിളക്കവും ഛർദിയുമുണ്ടായ സാഹചര്യത്തിൽ ചിങ്ങോലി ചൂരവിള ഗവ. എൽ.പി. സ്‌കൂളിൽ മെഡിക്കൽ സംഘം പരിശോധന നടത്തി. ജില്ലാ മെഡിക്കൽ ഓഫീസർ ജമുനാ വർഗീസിന്റെ നേതൃത്വത്തിലുളള സംഘമാണ് തിങ്കളാഴ്ച രാവിലെ സ്‌കൂളിൽ പരിശോധന നടത്തിയത്. ഗ്രാമപ്പഞ്ചായത്ത് പ്രസിഡന്റ് പദ്മശ്രീ ശിവദാസൻ, ജില്ലാ സർവലൈൻസ് ഓഫീസർ ഡോ. ജീന റാഫേൽ, ജില്ല ലാബോറട്ടറി ടെക്‌നീഷ്യൻ ജയ എന്നിവരും പഞ്ചായത്തംഗങ്ങളും മെഡിക്കൽ കോളേജ് കമ്മ്യൂണിറ്റി മെഡിസിൻ വിഭാഗവും പരിശോധനയിൽ പങ്കെടുത്തു. പ്രാഥികാരോഗ്യ കേന്ദ്രം മെഡിക്കൽ ഓഫീസർ ഡോ. ഷിനുവിന്റെ നേതൃത്വത്തിൽ മെഡിക്കൽ ക്യാമ്പും നടത്തി. രോഗ ബാധിതരായ കുട്ടികളുടെയും അധ്യാപകരുടെയും സാമ്പിളുകൾ ആലപ്പുഴ എൻ.ഐ.വി.യിലേക്ക് പരിശോധനയ്ക്ക് അയച്ചു. 48 കുട്ടികൾക്കും ഏഴ് അധ്യാപകർക്കും ഒരു പാചകത്തൊഴിലാളിക്കുമാണ് അസുഖം ബാധിച്ചത്.