മാവേലിക്കര: സ്വകാര്യ വക്തിയുടെ സ്ഥലത്തേക്ക് ഡ്രൈവിംഗ് ടെസ്റ്റ് ഗ്രൗണ്ട് മാറ്റിയതി​ൽ പ്രതിഷേധിച്ച് നഗരസഭ കൗൺസിലർമാർ ജോയിന്റ് ആർ.ടി.ഒയെ തടഞ്ഞുവെച്ചു. ഇന്നലെ രാവിലെ 11.30ന് ആരംഭി​ച്ച സമരം ഒരു മണിയോടെ സി.ഐയുടെ നേതൃത്വത്തിൽ പൊലീസ് എത്തി നടത്തിയ ചർച്ചയിലാണ് അവസാനിപ്പിച്ചത്. മാവേലിക്കര ജോ.ആർ.റ്റി.ഒ ഉന്നത ഉദ്യോഗസ്ഥരുമായി ഫോണിൽ ബന്ധപ്പെട്ട ശേഷം, ഡ്രൈവിംഗ് ടെസ്റ്റ് പുനഃസ്ഥാപിക്കുന്ന വിഷയത്തിൽ ഉന്നതതല ചർച്ച നടത്തി ഒരാഴ്ചക്കുള്ളിൽ പരിഹാരം കാണുമെന്ന കത്ത് ബ്ലോക്ക് കോൺഗ്രസ് പ്രസിഡന്റ് അനി വർഗീസിന് കൈമാറി​.

പാർലമെന്ററി പാർട്ടി ലീഡർ നൈനാൻ സി.കുറ്റിശ്ശേരിൽ, മണ്ഡലം പ്രസിഡന്റുമാരായ ജസ്റ്റിസൺ പാട്രിക്, മാത്യു കണ്ടത്തിൽ, നഗരസഭ ചെയർമാൻ കെ.വി.ശ്രീകുമാർ, വൈസ് ചെയർപേഴ്സൺ റ്റി.കൃഷ്ണകുമാരി, ശാന്തി അജയൻ, ലളിത രവീന്ദ്രനാഥ്, മനസ്സ് രാജൻ, ലത മുരുകൻ എന്നിവരുടെ നേതൃത്വത്തിലാണ് സമരം നടത്തിയത്.