പറവൂ‌‌‌ർ: പറവൂർ നഗരത്തിലെ ഏറ്റവും തിരക്കേറിയ കവലയാണ് ചേന്ദമംഗലം കവല. പതിറ്റാണ്ടിലധികം പഴക്കമുള്ള സിഗ്നൽ ലൈറ്റുകളുടെ തകരാറായിരുന്നു ഇതുവരെ കവലയിലെ ഗതാഗത തടസത്തിന് പ്രധാന കാരണം. സിഗ്നൽ തകരാർ താത്കാലികമായി പരിഹരിച്ചപ്പോൾ കുരുക്കി​ന് വഴി​യൊരുക്കി​​ വെള്ളക്കെട്ടായി​. ഒരു മഴപെയ്താൽ വെള്ളക്കെട്ടിലാകുന്ന റോഡി​ലൂടെ വാഹനങ്ങൾ കവല കടക്കാൻ ഏറെ ബുദ്ധിമുട്ടണം. സ്ഥി​തി​ഗതി​കൾ രൂക്ഷമാക്കി​യത് കാനയിലെ തടസമാണ്. ഇത് പരിഹരിക്കാൻ മൂന്നുദിവസം മുമ്പാണ് റോഡ് പൊളിച്ച് കാന ശുചീകരണം തുടങ്ങിയത്. ഇതോടെ നഗരത്തിൽ കുരുക്കോട് കുരുക്കായി​.

ചേന്ദമംഗലം കലയിലെ ഗതാഗതതടസം കച്ചേരിപ്പടിയും കഴിഞ്ഞ് നമ്പൂരിയച്ചൻ ആൽവരെ എത്തി. തിരക്കേറിയ സമയത്ത് ഗതാഗതക്കുരുക്ക് അതി​രൂക്ഷമാണ്. ശുചീകരണ ജോലികൾ ഇഴഞ്ഞുനീങ്ങുകയാണ്. അതിരാവിലെ മുതൽ രാത്രിവരെ രണ്ട് ട്രാഫിക് വാർഡൻമാരെ നിറുത്തിയിട്ടും കുരുക്കഴി​ക്കാൻ സാധിക്കുന്നില്ല. കച്ചേരിപ്പടിയിൽനിന്ന് അരക്കിലോമീറ്റർ അകലെയുള്ള ചേന്ദമംഗലം കവല കടക്കാൻ ചിലസമയത്ത് കാൽമണി​ക്കൂറി​ലേറെ വേണ്ടിവരുന്നു. ഗതാഗതക്കുരുക്ക് സമീപത്തെ വ്യാപാരസ്ഥാപനങ്ങളെയും ദോഷകരമായി​ ബാധിക്കുന്നുണ്ട്.

ഗതാഗതക്കുരുക്കുണ്ടാക്കുന്നത്

1 ചേന്ദമംഗലം കവലയിലെ ഗതാഗത തടസത്തിന് പ്രധാന കാരണം റോഡിന്റെ വീതികുറവാണ്.

2 നാല് ഭാഗത്തുനിന്നും വരുന്ന വാഹനങ്ങൾക്ക് ഫ്രീ ലെഫ്റ്റ് സംവിധാനം ഇവിടെ നടപ്പാക്കാൻ സാധിക്കില്ല.

3 തിരക്ക് ഒഴിവാക്കാൻ പുല്ലംകുളം റോഡിലേയ്ക്ക് കവലയിൽനിന്ന് പ്രവേശനം ഒഴിവാക്കിയെങ്കിലും പൂർണമായും പരിഹരിക്കാൻ സാധിച്ചിട്ടില്ല.

4 ചേന്ദമംഗലം കവല വികസിപ്പി​ക്കാൻ നിരവധി പദ്ധതികൾ തയ്യാറാക്കിയെങ്കിലും നടന്നില്ല. സമീപത്തെ വ്യാപാരസ്ഥാപനങ്ങൾ പൊളിച്ചുമാറ്റിയുള്ള വികസനത്തെ വ്യാപാരികൾ എതിർത്തു.

5 സ്ഥലം ഏറ്റെടുക്കുന്നതിനുള്ള ഫണ്ട് ഇല്ലാത്തതും പദ്ധതി പാളാനി​ടയാക്കി​.

പൊതുമരാമത്ത് നിരത്ത് വിഭാഗത്തിന്റെ റണ്ണിംഗ് കോൺട്രാക്ട് സ്കീമിൽ ഉൾപ്പെടുത്തിയാണ് കാനതുറന്ന് വെള്ളക്കെട്ട് പരിഹരിക്കുന്നത്. പ്രവൃത്തികൾ വേഗത്തിൽ പൂർത്തിയാക്കും.

ബീന ശശിധരൻ

നഗരസഭ ചെയർപേഴ്സൺ