തൃപ്പൂണിത്തുറ: വില്പനക്കായി കൊണ്ടുവന്ന 485 ഗ്രാം എം.ഡി.എം.എയുമായി ഏറ്റുമാനൂർ അരങ്ങാട്ടുപറമ്പിൽ അമീർ മജീദ് (33) ചങ്ങനാശേരി പെരുന്ന പടിഞ്ഞാറേക്കര വീട്ടിൽ വർഷ (22) എന്നിവരെ ഹിൽപാലസ് പൊലീസ് അറസ്റ്റ് ചെയ്തു. ഇന്നലെ വൈകിട്ട് മൂന്നരയോടെ ഹിൽപാലസ് റോഡിൽ കരിങ്ങാച്ചിറയിൽ വാഹന പരിശോധനയ്ക്കിടെയാണ് ഇവർ പിടിയിലായത്. സംഘത്തിലെ മൂന്നാമൻ ഓടി രക്ഷപ്പെട്ടു. പൊലീസിനെ കണ്ട് ഇവർ സഞ്ചരിച്ച കാർ നിർത്താതെ പോവുകയും, വഴി അവസാനിച്ചതോടെ പിൻതുടർന്നെത്തിയ പൊലീസ് പിടികൂടുകയുമായിരുന്നു. ബംഗളൂരുവിൽ നഴ്സിംഗ് വിദ്യാർത്ഥിനിയായ വർഷ ഇന്നലെ രാവിലെയാണ് എം.ഡി.എം.എയുമായി കൊച്ചിയിലെത്തിയത്. സി.ഐ.ആനന്ദ് ബാബുവിന്റെ നേതൃത്വത്തിൽ എസ്.ഐമാരായ ടോൾസൺ, ബിജു, സി.പി.ഒമാരായ മധു, സുജീഷ്, അശ്വിൻ എന്നിവരടങ്ങിയ സംഘമാണ് പ്രതികളെ കസ്റ്റഡിയിലെടുത്തത്.