കൊച്ചി: തർക്കത്തിലുള്ള പാളയം സി.എസ്.ഐ പള്ളി പരിസരത്ത് ക്രമസമാധാനം ഉറപ്പാക്കാൻ പൊലീസിന് ഹൈക്കോടതിയുടെ നിർദ്ദേശം. നിയമം കൈയിലെടുക്കാൻ ആരെയും അനുവദിക്കരുത്. നിർദ്ദേശം ലംഘിച്ച് ക്രമസമാധാന പ്രശ്‌നം ഉണ്ടാക്കുന്നവർക്കെതിരെ കേസെടുക്കണമെന്നും പൊലീസിന് ജസ്റ്റിസ് ദേവൻ രാമചന്ദ്രൻ നിർദ്ദേശം നൽകി. പൊലീസ് സംരക്ഷണം ആവശ്യപ്പെട്ട് ഇരുവിഭാഗവും നൽകിയ ഹർജികളിലാണ് ഉത്തരവ്. പള്ളിയുടെ അധികാര തർക്കത്തിൽ ഇടപെടുന്നില്ലെന്നും നിയന്ത്രണം സംബന്ധിച്ച അന്തിമതീരുമാനം സുപ്രീം കോടതിയുടേതായിരിക്കുമെന്നും ഹൈക്കോടതി വ്യക്തമാക്കി.