ആമ്പല്ലൂർ: കാർഷിക വിളകൾ നടുന്നതിനും വിത്തുകൾ പാകുന്നതിനും ആമ്പല്ലൂർ ഗ്രാമപഞ്ചായത്തിന്റെ ആഭിമുഖ്യത്തിൽ നാളെ തിരുവാതിര ഞാറ്റുവേല സംഘടിപ്പിക്കും. മില്ലുങ്കൽ ജംഗ്ഷനിൽ ഉള്ള അഗ്രോ മാർട്ട് അങ്കണത്തിൽ ആമ്പല്ലൂർ ഗ്രാമപഞ്ചായത്തും, കൃഷി ഭവനും മില്ലുങ്കൽ ചന്തയും സംയുക്തമായി ഞാറ്റുവേല ചന്തയും ഒരുക്കിയിട്ടുണ്ട്. ആമ്പല്ലൂർ ഗ്രാമ പഞ്ചായത്ത് പ്രസിഡന്റ് ബിജു.എം.തോമസ് അദ്ധ്യക്ഷത വഹിക്കുന്ന ചടങ്ങിൽ മുളന്തുരുത്തി ബ്ലോക്ക് പഞ്ചായത്ത് പ്രസിഡന്റ്ഷാ ജി മാധവൻ ഞാറ്റുവേല ചന്തയുടെ ഉദ്ഘാടനവും ജില്ലാ പഞ്ചായത്ത് അംഗം അനിത ടീച്ചർ ആദ്യ വില്പനയും നിർവഹിക്കും. വിവിധ കൃഷി കൂട്ടങ്ങൾ, കുടുംബശ്രീ, കർഷക കൂട്ടായ്മകൾ, ഗവ.അംഗീകൃത ഏജൻസികൾ (സസ്യ ഇക്കോ ഷോപ്പ് ഉദയംപേരൂർ, റൈഡ്കോ , കമ്ക്കോ മുതലായവ) എന്നിവരുടെ നടീൽ വസ്തുക്കൾ, ഉത്പാദന ഉപാധികൾ, മൂല്യവർദ്ധിത ഉത്പന്നങ്ങൾ എന്നിവയുടെ പ്രദർശനവും വില്പനയും ഉണ്ടായിരിക്കുമെന്ന് കൃഷി ഓഫീസർ അറിയിച്ചു.

റെയിഡ്കോ പിറവം ബ്രാഞ്ചിൻ്റെ അഭിമുഖ്യത്തിൽ കാർഷിക യന്ത്രങ്ങളുടെയും ഉപകരണങ്ങളുടെയും പ്രദർശനവും വില്പനയും ഉണ്ടായിരിക്കും. എസ്.എം.എ.എം പദ്ധതിയുടെ സൗജന്യ ഓൺലൈൻ രജിസ്ട്രേഷനും സ്പ്രേയറുകൾ , ബ്രഷ് കട്ടറുകൾ എന്നിവയുടെ സർവീസ് ക്യാമ്പും ഉണ്ടായിരിക്കും.. രജിസ്ട്രേഷന് കർഷകർ ഒരു പാസ് പോർട്ട് സൈസ് ഫോട്ടോ, ആധാർ കാർഡ്, ബാങ്ക് പാസ് ബുക്ക്, കരം അടച്ച രസീത് (പുതിയത്) എന്നിവയുടെ പകർപ്പുകളും കൊണ്ടുവരണം. എസ്.സി​, എസ്.ടി​ വി​ഭാഗങ്ങൾ അർഹത തെളി​യി​ക്കുന്ന സർട്ടി​ഫി​ക്കറ്റ് നൽകണം.