മൂവാറ്റുപുഴ : ജനമൈത്രി പൊലീസിന്റെ ആഭിമുഖ്യത്തിൽ മൂവാറ്റുപുഴ കെ.എസ്.ആർ.ടി.സി സ്റ്റാൻഡ് പരിസരത്തെ ഓട്ടോറിക്ഷ ഡ്രൈവർമാർക്ക് മൺസൂൺ സുരക്ഷയുടെ ഭാഗമായി സന്ധ്യാ ക്ലാസ് സംഘടിപ്പിച്ചു. മഴക്കാല മോഷ്ടാക്കളെ പിടികൂടുന്നതിന്റെ ഭാഗമായാണ് ക്ലാസ് നടത്തിയത്. സാമൂഹ്യ വിരുദ്ധരുടെ സാന്നിദ്ധ്യം ശ്രദ്ധയിൽപ്പെട്ടാൽ വിവരം പൊലീസിന് കൈമാറുക, സംശയാസ്പദമായ സാഹചര്യത്തിലും സ്ഥലങ്ങളിലും ഓട്ടോറിക്ഷ വിളിച്ചു കൊണ്ടുപോയാൽ പൊലീസിനെ അറിയിക്കുക എന്നീ കാര്യങ്ങൾ ഡ്രൈവർമാരുടെ ശ്രദ്ധയിൽപ്പെടുത്തി. സാമൂഹ്യ വിരുദ്ധരുടെയും മോഷ്ടാക്കളുടെയും ശല്യമില്ലാതാക്കി ക്ലീൻ മൂവാറ്റുപുഴയാക്കുന്നതിന് ഓട്ടോ ഡ്രൈവർമാർക്ക് നിർണായക സ്വാധീനം ചെലുത്താൻ കഴിയുമെന്ന് ഇൻസ്പെക്ടർ ബി. കെ അരുൺ പറഞ്ഞു. സ്റ്റേഷൻ പി.ആർ.ഒ അസി. സബ് ഇൻസ്പെക്ടർ സിബി അച്യുതനാണ് ക്ലാസ് നയിച്ചത്.