കൊച്ചി: തായ്‌ലൻഡ് ടൂറിസം വികസനത്തിന് കേരളത്തിലെ വിനോദ സഞ്ചാര മേഖലയിൽ പ്രവർത്തിക്കുന്ന ടൂർ ഓപ്പറേറ്റർമാർക്ക് ക്ഷണം. തായ്‌ലൻഡ് സർക്കാരിന്റെ കീഴിലുള്ള ടൂറിസം അതോറിട്ടി ഒഫ് തായ്‌ലൻഡ് (ടി.എ.ടി) സംഘടിപ്പിക്കുന്ന ഉച്ചകോടിയിലേക്കാണ് കേരളത്തിലെ പ്രമുഖ ടൂറിസം സംഘടനയായ മൈ കേരളാ ടൂറിസം അസോസിയേഷന് ക്ഷണം ലഭിച്ചിരിക്കുന്നത്. ആഗസ്റ്റ് 21 മുതൽ 25 വരെ തായ്‌ലൻഡിലും കാഞ്ചനബുരിയിലുമായി നടക്കുന്ന ഉച്ചകോടിയിൽ അസോസിയേഷനിലെ അംഗങ്ങളായ 40 ഓളം ടൂർ ഓപ്പറേറ്റർമാർ പങ്കെടുക്കുമെന്ന് എം.കെ.ടി.എ പ്രസിഡന്റ് അനി ഹനീഫ്, സെക്രട്ടറി ദിലീപ് കുമാർ എന്നിവർ പറഞ്ഞു. ദേശീയ, അന്തർദേശീയ തലത്തിൽ മൈ കേരളാ ടൂറിസം അസോസിയേഷന് ക്ഷണം ലഭിക്കുന്ന 23ാമത്തെ യോഗമാണിതെന്നും ഭാരവാഹികൾ പറഞ്ഞു.