തൊടുപുഴ :കൊച്ചിയുടെ ഉപഗ്രഹനഗരമായ തൊടുപുഴയുടെ വികസനം സാദ്ധ്യമാക്കാൻ കൊച്ചി മെട്രോ തൊടുപുഴയ്ക്ക് നീട്ടണംമെന്ന് മർച്ചന്റ്‌സ് അസോസിയേഷൻ ആവശ്യപ്പെട്ടു. കൊച്ചി മെട്രോ തൊടുപുഴയ്ക്ക് നീട്ടി കാക്കനാട് ഇൻഫോപാർക്ക് വഴി നെടുമ്പാശ്ശേരി എയർപോർട്ടിലേക്ക് കണക്ട് ചെയ്താൽ അത് ഇടുക്കി ജില്ലയ്ക്ക് മാത്രമല്ല സംസ്ഥാനത്തിന് തന്നെ വലിയ കുതിച്ചു ചാട്ടം ഉണ്ടാക്കുമെന്നും യോഗം വിലയിരുത്തി.

യാത്രാബുദ്ധിമുട്ട് പരിഹരിക്കാൻ മോർ ജംഗ്ഷനിലെ ഗതാഗത കുരുക്ക് പരിഹരിക്കണം,കാഞ്ഞിരമറ്റം പാലം പൂർത്തീകരിച്ച് അപ്രോച്ച് റോഡിന്റെ നിർമ്മാണവും എത്രയും പെട്ടന്ന് പൂർത്തീകരിക്കണം, മങ്ങാട്ടുകവലയിളും ടൗണിന്റെ വിവിധ മേഖലകളിലുമുള്ള വെള്ളക്കെട്ട് പരിഹരിക്കണം.

ചെറുകിട വ്യാപാരമേഖലയെ തകർക്കുന്ന വൻകിട കുത്തകകളുടെ കടന്നു കയറ്റം അവസാനിപ്പിക്കണമെന്നും വ്യാപാരമാന്ദ്യം മൂലം ആത്മഹത്യയുടെ വക്കിൽ എത്തി നിൽക്കുന്ന വ്യാപാരികളുടെ കടം എഴുതിതള്ളണമെന്നും അജീവ് പുരുഷോത്തമന്റെ അധ്യക്ഷതയിൽ കൂടിയ യോഗം നിർദേശിച്ചു. മർച്ചന്റ്സ് അസോസിയേഷന്റെ പ്രസിഡന്റായി രാജു തരണിയിൽ സ്ഥാനം ഏറ്റെടുത്തു.ജില്ലാ ട്രഷറർ ആർ. രമേശ്,ബ്ലോക്ക് പ്രസിഡന്റ് എൻ. പി ചാക്കോ, തുടങ്ങിയവർ പ്രസംഗിച്ചു. സജി പോൾ സ്വാഗതവും കെ. സി.നവാസ് നന്ദിയും പറഞ്ഞു.