പീരുമേട്: പീരുമേട് ഉപജില്ലയിൽ ഒന്നാംക്ലാസിൽ പ്രവേശനം നേടിയവരിൽ 70 കുട്ടികൾ അന്യസംസ്ഥാന തൊഴിലാളികളുടെ മക്കൾ. എൽ.പി, യു.പി വിഭാഗങ്ങളിലായി 376 അന്യസംസ്ഥാന പഠനരംഗത്തുണ്ട്. ഇവരെ പഠിപ്പിക്കുന്നത് സംസ്ഥാന വിദ്യാഭ്യാസ വകുപ്പിന്റെ ഔട്ട് ഓഫ് സ്‌കൂൾ പദ്ധതി പ്രകാരമാണ്. ഒരു സ്‌കൂളിൽ 15ലധികം കുട്ടികൾ ഉണ്ടെങ്കിൽ പ്രത്യേകം സെന്റർ അനുവദിക്കും. ഇത്തരത്തിൽ 12 സെന്ററുകളാണ് പീരുമേട് ഉപജില്ലയിൽ പ്രവർത്തിക്കുന്നത്. സർവ്വശിക്ഷ കേരളയുടെ (എസ്.എസ്.കെ) നേതൃത്വത്തിലുള്ള റെയിൻബോ എന്ന സിലബസ് പ്രകാരം പ്രത്യേക പരിശീലനം ലഭിച്ച അദ്ധ്യാപകരാണ് ഇവർക്ക് ക്ലാസെടുക്കുന്നത്. പ്രത്യേകം തയ്യാറാക്കിയ പാഠപുസ്തകവും ഇവർക്ക് നൽകുന്നുണ്ട്. ആസ്സാം സ്വദേശികളുടെ മക്കളാണ് വിദ്യാർത്ഥികളിലധികവും. ബീഹാർ, ജാർഖണ്ട്, ഒറീസ, പശ്ചിമബംഗാൾ എന്നീ സംസ്ഥാനങ്ങളിൽ നിന്നുള്ള കുട്ടികകളും പുഠിക്കാനുണ്ട്. ഇവർ പ്രധാനമായും മലയാളമാണ് ഒന്നാം ഭാക്ഷയായി പഠിക്കുന്നത്. തമിഴ് ഒന്നാം വിഷയമായി പഠിക്കുന്ന കുട്ടികളുമുണ്ട്. ജില്ലയിൽ അന്യസംസ്ഥാന കുട്ടികൾ ഏറ്റവും കൂടുതൽ പഠിക്കുന്നത് പുള്ളിക്കാനം എൽ.പി.സ്‌കൂളിലാണ്- 58പേർ. കുട്ടിക്കാനം സെന്റ്‌ജോസഫ് എൽ.പി സ്‌കൂളിൽ- 43, ഡൈമുക്ക്, പശുപാറ എൽ.പി സ്‌കൂളുകളിൽ 38 വീതം, ഏലപ്പാറ, ചോറ്റുപാറ എൽ.പി സ്‌കൂളുകളിൽ 33 വീതം, ചെമ്മണ്ണ്, വാഗമൺ സ്‌കൂളുകളിൽ 24, കരടിക്കുഴി എൽ.പി.എസ്- 25, ചീന്തലാർ ഹൈസ്‌ക്കൂൾ- 22 എന്നിങ്ങനെയാണ് അന്യസംസ്ഥാന കുട്ടികളുടെ എണ്ണം. ഇവർക്കും സംസ്ഥാന പൊതു വിദ്യാഭ്യാസ വകുപ്പ് ഉച്ചഭക്ഷണവും യൂണിഫോമും സൗജന്യമായി വിതരണം ചെയ്യുന്നുണ്ട്.

അന്യസംസ്ഥാന തൊഴിലാളികളുടെ എണ്ണവും കൂടി

കഴിഞ്ഞ ഏതാനും വർഷങ്ങൾക്കുള്ളിൽ പീരുമേട് താലൂക്കിലെ ഏലം, തേയില, തോട്ടം മേഖലയിൽ സ്ഥിരമായി താമസിക്കുന്ന അന്യസംസ്ഥാന തൊഴിലാളികളുടെ എണ്ണവും വർദ്ധിച്ചിരിക്കുകയാണ്. പലതോട്ടങ്ങളിലും നാട്ടുകാരേക്കാൾ കൂടുതൽ അന്യസംസ്ഥാന തൊഴിലാളികൾ പണിയെടുക്കുന്നുണ്ട്. അന്യസംസ്ഥാനങ്ങളിൽ നിന്ന് സ്ഥിരമായി കുടുംബമായി തോട്ടംമേഖലയിൽ സ്ഥിരതാമസമാക്കിയ മാതാപിതാക്കളുടെ കുട്ടികളാണ് ഇവിടെ പഠിക്കുന്നത്.